U Minsku parkoŭka ŭ Vierchnim horadzie moža padaražeć. Adpaviedny prajekt rašeńnia Minharvykankama prachodzić uzhadnieńnie. Pra heta paviedamiŭ hałoŭny inžynier dziaržaŭnaha abjadnańnia «Haražy, aŭtastajanki i parkoŭki» Piotr Prudnikaŭ.
Jon rastłumačyŭ, što pavieličeńnie płaty za parkoŭku ŭ Vierchnim horadzie abumoŭlenaje ŭładkavańniem tam piešachodnaj zony i skaračeńniem u hetaj suviazi mašyna-miescaŭ. U pryvatnaści, pad piešachodnuju zonu było prybrana 70-80 miescaŭ.
U ciapierašni čas pieršaja hadzina parkoŭki kaštuje 2 rubli, prajektam rašeńnia meryi prapanujecca pavialičyć taryf da 5 rubloŭ. «Taki taryf dazvolić zabiaśpiečyć 10% volnych miescaŭ na parkoŭcy ŭ Vierchnim horadzie ŭ hadziny pik», — skazaŭ hałoŭny inžynier. Razam z tym Piotr Prudnikaŭ zaŭvažyŭ, što prapanova ab pavyšeńni taryfu na takuju vieličyniu jašče ŭ stadyi razhladu. «Mahčyma, pavieličeńnie budzie na mienšuju sumu — da 3 rubloŭ za hadzinu, naprykład», — dadaŭ jon.
Jak paviedamlałasia, pry rekanstrukcyi parkovak u Vierchnim horadzie i ŭ suviazi z denaminacyjaj całkam zamienienyja aŭtamatyčnyja kasy pa pryjomie płaty za parkoŭku. Ustanoŭlenyja novyja kasy, jakija dazvalajuć prymać płatu papiarovymi hrašyma uzoru 2009 hoda, manietami i bankaŭskaj kartaj. Jany vydajuć zdaču manietami i papiarovymi hrašyma. Na pierabudovu aŭtamatyzavanych sistem pa pryjomie płaty za parkoŭku i rearhanizacyju ŭjaznych hrup inviestar vydatkavaŭ bolš jak 50 tysiač (u denaminavanych rublach).
Kamientary