«Tranśniefć» admoviłasia padpisvać dadatkovaje pahadnieńnie ab novym taryfie na tranzit nafty praź Biełaruś

PAT «Tranśniefć» admoviłasia padpisvać prapanavanaje biełaruskim bokam dadatkovaje pahadnieńnie ab novym taryfie na tranzit nafty praź Biełaruś. Dakumient viernuty biez padpisańnia, pakolki biełaruski bok parušaje dziejnuju mietodyku ŭzhadnieńnia taryfaŭ, zajaviŭ pradstaŭnik «Tranśniefci», savietnik prezidenta kampanii Ihar Dziomin.

«Treciaha kastryčnika 2016 hoda ŭ «Tranśniefć» pastupiŭ list ad AAT «Homieltransnafta Družba» z prapanovaj padpisać dadatkovaje pahadnieńnie da dziejnaj damovy na akazańnie pasłuh pa transparciroŭcy nafty… Sutnaść prajekta dadatkovaha pahadnieńnia zaklučajecca ŭ pavieličeńni koštu taryfaŭ na pasłuhi pa transparciroŭcy nafty pa mahistralnych trubapravodach z 10 kastryčnika 2016 hoda, raźmieščanych na terytoryi Respubliki Biełaruś», — cytuje Dziomina ahienctva ekanamičnaj infarmacyi «Prajm».

Niekalki hadzin tamu ŭ kamientary TASS Dziomin paviedamiŭ, što «Tranśniefć» apaviaściła rasijskija naftavyja kampanii pra pavieličeńnie taryfu na tranzit nafty praź Biełaruś. «Tranśniefć» infarmuje, što z 10 kastryčnika źmianiajucca taryfy na transparciroŭku praź Biełaruś. Hetyja źmieny buduć uličvacca pry afarmleńni zadańnia na płaciež. Adnačasova paviedamlajem, što pravodzim rabotu pa admienie pastanovy, pryniataj Biełaruśsiu ab pavyšeńni taryfu. U vypadku admieny pastanovy «Tranśniefć» ažyćciavić viartańnie abo zalik zališnie vypłačanych sum, jakija ŭtvoracca», — skazaŭ jon.

U biełaruskim Ministerstvie antymanapolnaha rehulavańnia i handlu paćvierdzili praviadzieńnie biełaruska-rasijskich pieramoŭ, pryśviečanych temie tranzitu nafty. «Viaducca kansultacyi z rasijskim bokam na ŭzroŭni kiraŭnictva ministerstva. Paśla ich pradstaŭniki viedamstva daduć kamientary», — paviedamiła TASS pres-sakratar ministerstva Alina Hilevič.

Atrymać dadatkovyja kamientary ŭ aficyjnych pradstaŭnikoŭ «Tranśniefci» i pres-sakratara Ministerstva antymanapolnaha rehulavańnia i handlu pakul nie ŭdałosia.

Nahadajem, 1 kastryčnika stała viadoma, što Biełaruś 11 kastryčnika pavysić taryfy na pasłuhi pa transpartavańni nafty pa mahistralnych trubapravodach adkrytych akcyjaniernych tavarystvaŭ «Homieltransnafta Družba» i «Połacktransnafta Družba», raźmieščanych na terytoryi krainy. Heta praduhledžana pastanovaj Ministerstva antymanapolnaha rehulavańnia i handlu ad 28 vieraśnia № 30.

Taryf za 1 tonu nieta (biez padatku na dadadzieny košt) pa maršrucie Unieča (Vysokaje) — Adamava Zastava składzie 400,98 rasijskaha rubla, Unieča (Vysokaje) — Brody — 172,23 rasijskaha rubla, Nieviel (Vialikija Łuki) — Połack — Vysokaje — 48,47 rasijskaha rubla (taryf na pasłuhi pa pryjomie i transpartavańni nafty dla dalejšaha jaje zamiaščeńnia pa napramkach Hiermanija, Čechija, Słavakija, Polšča, Vienhryja, Ukraina). Dziejnyja taryfy byli ŭstalavanyja 1 lutaha 2016 hoda. Pa hetych napramkach jany składali: 267,32, 114,82 i 32,31 rasijskaha rubla adpaviedna.

U kampanii «Tranśniefć» na nastupny dzień zajavili, što Biełaruś nie prainfarmavała rasijski bok pra pazapłanavaje pavyšeńnie taryfaŭ, što źjaŭlajecca parušeńniem dziejnych pahadnieńniaŭ. Paśla hetaha rasijskaja kampanija apaviaściła ab tym, što adbyvajecca, Fiederalnuju antymanapolnuju słužbu (FAS). 3 kastryčnika načalnik upraŭleńnia kantrolu paliŭna-enierhietyčnaha kompleksu FAS Dźmitryj Machonin zajaviŭ, što situacyja z pavyšeńniem Biełaruśsiu taryfaŭ na tranzit nafty moža vyrašacca ŭ sudzie.

Biełaruś z pačatku biahučaha hoda viadzie pieramovy z Rasijaj ab źnižeńni cen na haz. Pry hetym ź lipienia Rasija bolš čym na tracinu skaraciła pastaŭki nafty, reahujučy na isnujučuju, z punktu hledžańnia rasijskaha boku, niedapłatu za pastaŭleny pryrodny haz. 12 vieraśnia Alaksandr Łukašenka daručyŭ vice-premjeru Uładzimiru Siamašku na praciahu dvuch dzion kančatkova damovicca z rasijskim bokam pa pastaŭkach enierhanośbitaŭ, adnak da hetaha času da pośpiechu pieramovy nie pryviali. Sa spasyłkaj na vice-premjera ŭrada RF Arkadzia Dvarkoviča taksama paviedamlałasia, što pieramovy buduć praciahvacca ŭ pačatku hetaha tydnia, ale, pavodle jaho słoŭ, skidka na haz na ich nie abmiarkoŭvajecca.

• 0
• 0
• 0
• 0
• 0
• 0
• 0
• 0