Suma niedapłaty biełaruskim bokam za pastaŭleny rasijski haz składaje 281 młn dalaraŭ i budzie pieraličana da 20 kastryčnika, zajaviŭ žurnalistam ministr enierhietyki Uładzimir Patupčyk 11 kastryčnika ŭ Minsku na adkryćci Biełaruskaha enierhietyčnaha i ekałahičnaha forumu.
Pry hetym ministr adznačyŭ, što apłata za vierasień budzie pravodzicca z ulikam pryniatych rašeńniaŭ u ramkach padpisanaha na minułym tydni pratakoła z Rasijaj. «Da 20 kastryčnika my raźličymsia za niedapłatu, srodki na heta zareziervavanyja ŭ biudžecie krainy i buduć svoječasova pieraličany», — zajaviŭ Patupčyk.
Adkazvajučy na pytańnie pra canu hazu, jon skazaŭ: «Košt da 1 lipienia 2017 hoda budzie raźličvacca pa formule «JANAA plus». Na siońniašni dzień na miažy Rasii i Biełarusi heta cana składaje 132 dalary za tysiaču kubamietraŭ pryrodnaha hazu».
Patupčyk taksama adznačyŭ, što cana budzie mianiacca ŭ adpaviednaści sa źmianieńniem cany ŭ Rasijskaj Fiederacyi i ŭ dalejšym raźličvacca pa vyšejnazvanaj formule. Z nahody padpisanaha z Rasijaj pahadnieńnia pa pytańniach pastavak hazu jon zajaviŭ, što havorka idzie pra rašeńnie, jakoje «nosić kampramisny charaktar i ŭzajemavyhadnaje dla abodvuch bakoŭ».
«Hety pratakoł dazvalaje nam na kompleksnaj asnovie vyrašyć prablemy, jakija ŭ nas byli ŭ naftahazavaj śfiery. Sam pratakoł, biezumoŭna, kampramis, ale zdarovy kampramis, jaki ŭličvaje intaresy dźviuch krain i dazvalaje nam siońnia z dobraj pierśpiektyvaj hladzieć u budučyniu ŭ ramkach budaŭnictva JEAES», — adznačyŭ Patupčyk. Pavodle jaho słoŭ, źjaviłasia mahčymaść da 1 lipienia 2019 hoda stvaryć ahulny elektraenierhietyčny rynak, a da 1 studzienia 2025 hoda — ahulny rynak hazu.
Havoračy ab sutnaści pratakoła, Patupčyk zajaviŭ: «Biełaruski bok pahadziŭsia z prapanovaj Rasii ab tym, što cana na haz z 1 studzienia 2016 hoda pa 1 lipienia 2019 hoda budzie raźličvacca pa formule «JANAA plus». U ramkach hetaha rašeńnia biełaruski bok pavinien da 20 kastryčnika hetaha hoda raźličycca pa niedapłacie za haz na praciahu 2016 hoda. Padkreślu, heta niedapłata, a nie zapazyčanaść u ramkach isnujučaj narmatyŭna-pravavoj bazy».
Akramia taho, biełaruski bok prapanavaŭ rasijskamu dla stvareńnia roŭnych umoŭ dla haspadarčych subjektaŭ pryniać rašeńnie, jakoje dazvolić biełaruskim enierhietykam zblizić ceny na haz z enierhietykami RF. «Heta zbližeńnie budzie adbyvacca raŭnamierna da pačatku pracy elektraenierhietyčnaha rynku JEAES za košt mižbiudžetnaj kampiensacyi z boku Rasii», — rastłumačyŭ Patupčyk. Pavodle jaho słoŭ, miechanizm hetaj kampiensacyi budzie vyznačany da 20 kastryčnika.
Taksama ŭ ramkach pratakoła dasiahnuta damoŭlenaść, što da 1 studzienia 2017 hoda budzie ŭniesiena adpaviednaje źmianieńnie ŭ mižuradavaje pahadnieńnie ad 2011 hoda pa cenach na haz. «Heta daść mahčymaść vyrašyć prablemu z dalejšym zbližeńniem cen na haz z 1 lipienia 2019 pa 1 studzienia 2025 hoda dla ŭsich astatnich subjektaŭ haspadarańnia Biełarusi», — adznačyŭ kiraŭnik viedamstva.
Jon jašče raz padkreśliŭ, što dasiahnutaje kampramisnaje pahadnieńnie dazvolić źniać usie prablemy ŭ hazavaj śfiery i «vybudavać narmalnyja adnosiny ŭ ramkach stvareńnia adzinych elektraenierhietyčnych i hazavych rynkaŭ». Taksama «źniaty ŭsie pytańni ŭ naftavaj śfiery».
Kamientary