Tryler u Rasii: žančyna chavałasia ad prystava na mohiłkach, ale jaje vydała varona
Žycharka Prymorja (RF), jakaja nie vypłaciła alimienty, źbiehła ad prystava, jaki pavinien byŭ uručyć joj pastanovu ab pryvodzie, i schavałasia na mohiłkach, adnak jaje vydała varona, havorycca ŭ paviedamleńni FSSP (Fiederalnaj słužby sudovych prystavaŭ) pa Prymorskim krai.
Sudovy prystaŭ, jaki adpraviŭsia da žančyny, zaŭvažyŭ jaje na darozie. «Taja, sprabujučy znajści spadarožnuju mašynu, chadziła ŭzdoŭž trasy, adčajna «hałasujučy», paviedamili ŭ viedamstvie.
Prystaŭ pasprabavaŭ uručyć žančynie dakumient, adnak jana, pakazaŭšy nieprystojny žest, kinułasia biehčy ŭ bok mohiłak, raźmieščanych praz darohu.
«Sudovamu prystavu, jaki pabieh za hramadziankaj, daviałosia pradziracca skroź zaraśniki kustoŭ i haliny dreŭ. U niejki momant alimientščyca raptam źnikła z pola zroku, adnak jaje vydała varona, jakaja sieła na dreva pobač z adnym z pomnikaŭ i pačała bieśpierapynna karkać, uparta pazirajučy ŭniz», — havorycca ŭ pres-relizie FSSP.
«Abyšoŭšy miesca mierkavanaj dysłakacyi uciakački, sudovy prystaŭ zajšoŭ «z tyłu» i cicha pastukaŭ palcam pa plačy hramadzianki, što prytuliłasia za pomnikam», — raspaviali ŭ viedamstvie.
U vyniku na žančynu byŭ składzieny administracyjny patakoł ab pieraškodzie zakonnaj dziejnaści słužbovaj asoby.
Kamientary