Трылер у Расіі: жанчына хавалася ад прыстава на могілках, але яе выдала варона
Жыхарка Прымор'я (РФ), якая не выплаціла аліменты, збегла ад прыстава, які павінен быў уручыць ёй пастанову аб прыводзе, і схавалася на могілках, аднак яе выдала варона, гаворыцца ў паведамленні ФССП (Федэральнай службы судовых прыставаў) па Прыморскім краі.
Судовы прыстаў, які адправіўся да жанчыны, заўважыў яе на дарозе. «Тая, спрабуючы знайсці спадарожную машыну, хадзіла ўздоўж трасы, адчайна «галасуючы», паведамілі ў ведамстве.
Прыстаў паспрабаваў уручыць жанчыне дакумент, аднак яна, паказаўшы непрыстойны жэст, кінулася бегчы ў бок могілак, размешчаных праз дарогу.
«Судоваму прыставу, які пабег за грамадзянкай, давялося прадзірацца скрозь зараснікі кустоў і галіны дрэў. У нейкі момант аліментшчыца раптам знікла з поля зроку, аднак яе выдала варона, якая села на дрэва побач з адным з помнікаў і пачала бесперапынна каркаць, упарта пазіраючы ўніз», — гаворыцца ў прэс-рэлізе ФССП.
«Абышоўшы месца меркаванай дыслакацыі уцякачкі, судовы прыстаў зайшоў «з тылу» і ціха пастукаў пальцам па плячы грамадзянкі, што прытулілася за помнікам», — распавялі ў ведамстве.
У выніку на жанчыну быў складзены адміністрацыйны патакол аб перашкодзе законнай дзейнасці службовай асобы.
Каментары