Jak čytačy «NN» razam ź Iharam Varaškievičam sustrelisia ŭ muziei «Alivaryi» FOTY
Razam z salistam «samaha piŭnoha hurtu» pieramožcy zmahli zazirnuć u historyju pieršaj pivavarni Biełarusi, jakaja zachavałasia da našych dzion.
Paru dzion tamu Naša Niva razam z kampanijaj «Alivaryja» zapuścili konkrus na rozyhryš siertyfikataŭ na vip-ekskursiju razam z hurtom «Krama» u muziej Alivaryi. Ahułam bolš za 150 čałaviek pryniali ŭdzieł u rozyhryšy.
Jak i było abiacana, šeść čałaviek na čale ź Iharam Varaškievičam adpravilisia na ekskursiju pa histaryčnaj i vytvorčaj častcy pradpryjemstva, dzie zmahli ŭbačyć, jak vyhladaŭ i pracavaŭ zavod ad samaha svajho zasnavańnia i jak varycca piva ciapier.
A pačałosia ŭsio z Rochli Frumkinavaj, jakaja ŭ 1864 hodzie pabudavała ŭ Minsku draŭlany budynak dla ŭładkavańnia pivavarnaha zavoda. Mienavita hetaja biznesvumen i źjaŭlajecca zasnavalnicaj «Alivaryi». Pad jaje kiraŭnictvam brovar mieŭ vytvorčaść u 80 tysiač viodraŭ piva na hod, pry tym što na samim zavodzie pracavała kala 30 rabotnikaŭ. U 1889 hodzie pradukcyja zavoda atrymała hanarovuju ŭznaharodu — załaty miedal Vilenskaha skakavoha abjadnańnia.
Tady praces pryhatavańnia piva pravodziŭsia z dapamohaj kamiennych žornaŭ. U ich zdrobleny soład źmiešvali z vadoj i davodzili tempieraturu vadkaści da 70 hradusaŭ. Pa vyniku atrymlivałasia piŭnoje susła, a na dnie čana zastavałasia makucha ad soładu. Piŭnoje susła pieralivali ŭ inšy čan dla kipiačeńnia, a makuchu adpraŭlali na korm žyviołam.
Rochla kiravała zavodam kala 20 hadoŭ, a ŭ 1893 hodzie pivavarnia pierajšła va ŭładańnie haradskomu hałavie Minska Karalu Janu Čapskamu. Jon pryvioŭ pradpryjemstva ŭ jeŭrapiejski vyhlad. Mienavita pry im u 1894 hodzie stvarajecca kamienny budynak zavoda, jaki zachavaŭsia da našych dzion. Pry im draŭlanyja čany zamianiajucca na mietaličnyja, ustanaŭlivajecca paravy kacioł, paravaja mašyna, elektryčnaje aśviatleńnie, a sam zavod atrymlivaje hučnuju nazvu — Paravy pivavarny zavod «Bahiemija» hrafa Karala Emierykaviča Čapskaha.
Heta samyja jaskravyja časy ŭ historyi zavoda. U 1918 hodzie zavod byŭ nacyjanalizavany i atrymaŭ nazvu «Biełaruś». Dakładna viadoma, što na im pracavali 91 rabočy i 8 kiraŭnikoŭ. U 1925-26 hadach u hod zavod vyrablaŭ 340 tysiač viodraŭ piva, pry faktyčnaj patrebie nasielnictva ŭ 250 tysiač viodraŭ.
Z pačatkam Druhoj suśvietnaj vajny pradpryjemstva, jak i Minsk, znachodzicca pad niamieckaj akupacyjaj, a piva vyrablajecca dla Viermachta. U 1941 hodzie na zavodzie dziejničała tajemnaja padpolnaja hrupa, jakaja dapamahała partyzanam, ale ŭ vyniku była rassakrečanaja i likvidavanaja. U vajenny čas budynak zavoda acaleŭ, tamu piŭzavod praciahvaŭ vyrablać pradukcyju.
Pivavarnia z časam mieła patrebu ŭ madernizacyi, ale savieckija ŭłady paličyli heta niemetazhodnym. I ŭ 1949 hodzie zavod aryjentujecca tolki na vyrab biezałkaholnych napojaŭ. Takim čynam, da 90-ch hadoŭ zavod pracavaŭ na starym abstalavańni, i tolki ŭ 1994 hodzie byŭ akcyjanavany dziakujučy Tamary Dudko, jakaja stanovicca dyrektaram zavoda. Pry joj byŭ viernuty handlovy znak — aroł, jaki trymaje bočku, łahatyp dapoŭniła data zasnavańnia zavoda — 1864 hod, a nazva stała biełaruskamoŭnaj. Z hetaha času nivodnaja akcyja «Alivaryi» nie naležyć dziaržavie.
Paśla ekskursii kožny zmoh prajści kurs navučańnia pa tym, jak pravilna abrać i pić piva. Acanić jakaść piva možna navat pa burbałkach — čym jany drabniejšyja, a piena bolš ščylnaja, tym lepš zvaranaje piva. Taksama pierad pieršym hłytkom treba ŭdychnuć vodar piva, zrabić pieršy hłytok i hłytać 20-25 siekund, kab adčuć smakavyja jakaści. Smak i vodar piva psujuć čypsy i mocna salonyja pradukty, a voś marskija pradukty i navat šakaład mohuć vydatna spałučacca z asobnymi hatunkami piva.
Ekskursii pa piŭzavodzie prachodziać z 12:00 da 17:30 ź sierady pa niadzielu pa papiarednim zapisie. Cana — ad 14 rubloŭ.
Frantmen «Kramy» Ihar Varaškievič zastaŭsia zadavoleny sustrečaj i ekskursijaj, a taksama znachodzicca ŭ pradčuvańni zaŭtrašniaha kancerta, jaki pryśviečany 25-hodździu hurtu:
«Vip-kvitki ŭžo raskuplenyja, ja navat čuŭ žart, što ŭ nas vip-publika. U 90-ch hadach my byli sapraŭdy «piŭnym» hurtom, ale ciapier ja ŭžo nie taki małady (śmiajecca). Ciapier užo piva pju letam, kali chaču. A dla naviedvalnikaŭ kancerta my rychtujem šmat siurpryzaŭ: pierarabili niekalki pieśniaŭ, jakija ciapier vykonvajem, naprykład, «Chavajsia ŭ bulbu» i «Padaje doždž», taksama budzie šmat piesień z 90-ch, z druhoha alboma. Spadziajusia, usie buduć tančyć!»
Kancert hurtu adbudziecca 12 listapada ŭ minskaj placoŭcy «Prime Hall».
Što zapisana aficyjnaj pryčynaj śmierci adzinaha syna Jarmošynaj?8
Kamientary