Navukoŭcy: Mozh chłopcaŭ i dziaŭčat pa-roznamu reahuje na mocny stres
Padziei, jakija vyklikali vielmi mocny stres, pa-roznamu ŭździejničajuć na mozh chłopcaŭ i dziaŭčat, śviedčać vyniki daśledavańnia, praviedzienaha Stenfardskim univiersitetam. Pra heta piša VVS.
Častka mozhu, jakaja adkazvaje za emocyi i empatyju (astraŭkovaja dola), jak vyśvietlili navukoŭcy, maje paraŭnalna maleńki pamier u dziaŭčat, jakija pieražyli traŭmu.
U toj ža čas u chłopcaŭ ź ciažkim dośviedam astraŭkovaja dola naadvarot akazałasia bolšaha pamieru, čym zvyčajna.
Heta moža rastłumačyć, čamu ŭ dziaŭčat čaściej, čym u chłopcaŭ, ŭźnikaje posttraŭmatyčnaje stresavaje rasstrojstva (PTSR), ličać navukoŭcy.
Pavodle daśledavańnia, chłopcy i dziaŭčaty mohuć demanstravać supraćlehłyja simptomy paśla asabliva pakutlivaj abo strašnaj padziei, a značyć, i lačyć ich, vidać, treba pa-roznamu.
Źmieny pamieru i abjomu
Daśledčaja hrupa sa škoły miedycyny Stendfardskaha ŭniviersiteta miarkuje, što dziaŭčaty z PTSR mohuć na samaj spravie pakutavać ad zanadta rezkaha stareńnia adnoj z častak astraŭkovaj doli.
Navukoŭcy praskanavali mozh 59 dziaciej va ŭzroście ad dzieviaci da 17 hadoŭ dla daśledavańnia, vyniki jakoha byli apublikavanyja ŭ vydańni Depression and Anxiety.
Adna hrupa składałasia z 14 dziaŭčat i 16 chłopcaŭ, jakija pieražyli pa mienšaj miery adzin epizod mocnaha stresu ci psichałahičnuju traŭmu, druhaja hrupa z 15 dziaŭčynak i 14 chłopčykaŭ nie mieła padobnaha dośviedu.
Daśledčyki zafiksavali źmieny pamieru i abjomu adnoj z častak astraŭkovaj doli — piaredniaj kruhavoj barazdy — u chłopcaŭ i dziaŭčat, jakija pieražyli stres.
Heta dakazvaje, što astraŭkovaja dola źmianiajecca pad uździejańniem stresu i adyhryvaje klučavuju rolu ŭ raźvićci posttraŭmatyčnaha sindromu, pierakananyja aŭtary navukovaj pracy
Roznyja reakcyi
Viadučy daśledčyk, doktar Miehan Kłabund kaža, što važna ŭličvać roznyja fizičnyja i emacyjnyja reakcyi chłopcaŭ i dziaŭčat na stresavyja padziei.
«Važna, kab ludzi, jakija pracujuć z traŭmavanymi maładymi ludźmi, uličvali pałavyja adroźnieńni», — adznačaje jana.
«Našy vyniki pakazvajuć, što, mahčyma, chłopcy i dziaŭčaty mohuć mieć roznyja simptomy traŭmy i im mohuć dapamahać roznyja mietady lačeńnia», — padkreślivaje Kłabund.
Pavodle jaje słoŭ, navukoŭcy ŭ ciapierašni čas daśledujuć inšyja adździeły mozhu, źviazanyja z astraŭkovaj dolaj, na pradmiet anałahičnych źmienaŭ.
Astraŭkovaja dola adkazvaje nie tolki za apracoŭku emocyj, ale i za raspaznavańnie sihnałaŭ ad inšych častak cieła.
Kamientary