Biełaruskija ŭdzielniki sustrečy z maršałam Sienata Polščy ŭ adzin hołas havaryli pra «Biełsat»

Patreba zachavać biełaruskamoŭny kanał čyrvonaj nitkaj prachodziła praz vystupy pradstaŭnikoŭ niezaležnaha hramadstva Biełarusi z maršałkam Sienata Polščy Stanisłavam Karčeŭskim.

Sustreča adbyłasia 6 śniežnia za śniadankam u hateli «Reniesans» u Minsku.

Ź biełaruskaha boku ŭ sustrečy ŭdzielničali jak pradstaŭniki palityčnaj apazicyi, tak i niezaležnych niedziaržaŭnych arhanizacyj. Siarod ich byli namieśnica staršyni Tavarystva biełaruskaj movy Alena Anisim, pravaabaronca-viasnoviec Valancin Stefanovič, eks-kandydat u prezidenty Alaksandr Milinkievič, były kiraŭnik Viarchoŭnaha Savieta Stanisłaŭ Šuškievič.

Z palitykaŭ byli zaprošanyja eks-kandydat u prezidenty Mikałaj Statkievič, lidar chryścijanskich demakrataŭ Pavieł Sieviaryniec, staršynia Ruchu za Svabodu Juraś Hubarevič, paet Uładzimir Niaklajeŭ, a taksama pradstaŭniki Abjadnanaj hramadzianskaj partyi i Partyi BNF.

U składzie polskaj delehacyi byli samyja roznyja ludzi — ad prezidenta Akademii navuk da kiraŭnika parłamienckaha kamiteta Polšča—Biełaruś. Apošni ŭjaŭlaje saboj nievysokaha rostam 25-hadovaha junaka ad vybarčaha śpisu Kukiza. Hety pan Andruškievič z Padlašša raniej uznačalvaŭ šavinistyčnuju arhanizacyju «Usiapolskaja moładź», jakaja, siarod inšaha, vykazvaje pretenzii na byłyja «kresy ŭschodnija».

Što da maršała Sienata, to asnoŭnyja jaho sustrečy adbylisia 5 śniežnia — z Alaksandram Łukašenkam i Michaiłam Miaśnikovičam. Łukašenka akcentavaŭ patrebu raźvićcia ekanamičnych kantaktaŭ. A Miaśnikovič davoli rezka zaściaroh haściej z Polščy ad źviadzieńnia histaryčnaha dyjałohu da «chadžeńnia pa mahiłach». Reč u tym, što polski bok, siarod inšaha, chacieŭ by ekshumavać pachavańni ŭ Kurapatach, kab adšukać tam pareštki tych polskich aficeraŭ, rasstralanych u 1940-m, miesca pachavańnia jakich dakładna nie viadoma. Miarkujecca, što kala 2500 ź ich zaviaršyli svaju žyćciovuju darohu ŭ turmach BSSR.

Što da sustrečy ź niezaležnym hramadstvam, to jana mieła na mecie pakazać značnaść hetaj temy dla Polščy. Dyjałoh, adnak, pa słovach Juryja Hubareviča, vyjšaŭ «dosyć žorstki». «Hałoŭnaja meta — zachavańnie niezaležnaści. Ale i padtrymka hramadzianskaj supolnaści — važnaja», — zaznačyŭ žurnalistam Hubarevič paśla sustrečy.

Spatkańnie adbyłosia za začynienymi dla reparcioraŭ dźviaryma. My paprysutničali tolki na jaho pačatku. Źviarnuła ŭvahu, što pan maršałak pryjechaŭ u Biełaruś sa svajoj pierakładčycaj — pryčym mienavita na biełaruskuju movu.

Jak daviedalisia ad udzielnikaŭ sustrečy, amal usie pradstaŭniki biełaruskaha boku havaryli pra važnaść padtrymańnia telekanała «Biełsat». U svaju čarhu, kiraŭnik Sienata zapeŭniŭ, što «Biełsat» praciahnie svajo viaščańnie.

• 0
• 0
• 0
• 0
• 0
• 0
• 0
• 0