Патрэба захаваць беларускамоўны канал чырвонай ніткай праходзіла праз выступы прадстаўнікоў незалежнага грамадства Беларусі з маршалкам Сената Польшчы Станіславам Карчэўскім.
Сустрэча адбылася 6 снежня за сняданкам у гатэлі «Рэнесанс» у Мінску.
З беларускага боку ў сустрэчы ўдзельнічалі як прадстаўнікі палітычнай апазіцыі, так і незалежных недзяржаўных арганізацый. Сярод іх былі намесніца старшыні Таварыства беларускай мовы Алена Анісім, праваабаронца-вясновец Валянцін Стэфановіч, экс-кандыдат у прэзідэнты Аляксандр Мілінкевіч, былы кіраўнік Вярхоўнага Савета Станіслаў Шушкевіч.
З палітыкаў былі запрошаныя экс-кандыдат у прэзідэнты Мікалай Статкевіч, лідар хрысціянскіх дэмакратаў Павел Севярынец, старшыня Руху за Свабоду Юрась Губарэвіч, паэт Уладзімір Някляеў, а таксама прадстаўнікі Аб'яднанай грамадзянскай партыі і Партыі БНФ.
У складзе польскай дэлегацыі былі самыя розныя людзі — ад прэзідэнта Акадэміі навук да кіраўніка парламенцкага камітэта Польшча—Беларусь. Апошні ўяўляе сабой невысокага ростам 25-гадовага юнака ад выбарчага спісу Кукіза. Гэты пан Андрушкевіч з Падляшша раней узначальваў шавіністычную арганізацыю «Усяпольская моладзь», якая, сярод іншага, выказвае прэтэнзіі на былыя «крэсы ўсходнія».
Што да маршала Сената, то асноўныя яго сустрэчы адбыліся 5 снежня — з Аляксандрам Лукашэнкам і Міхаілам Мясніковічам. Лукашэнка акцэнтаваў патрэбу развіцця эканамічных кантактаў. А Мясніковіч даволі рэзка засцярог гасцей з Польшчы ад звядзення гістарычнага дыялогу да «хаджэння па магілах». Рэч у тым, што польскі бок, сярод іншага, хацеў бы эксгумаваць пахаванні ў Курапатах, каб адшукаць там парэшткі тых польскіх афіцэраў, расстраляных у 1940-м, месца пахавання якіх дакладна не вядома. Мяркуецца, што каля 2500 з іх завяршылі сваю жыццёвую дарогу ў турмах БССР.
Што да сустрэчы з незалежным грамадствам, то яна мела на мэце паказаць значнасць гэтай тэмы для Польшчы. Дыялог, аднак, па словах Юрыя Губарэвіча, выйшаў «досыць жорсткі». «Галоўная мэта — захаванне незалежнасці. Але і падтрымка грамадзянскай супольнасці — важная», — зазначыў журналістам Губарэвіч пасля сустрэчы.
Спатканне адбылося за зачыненымі для рэпарцёраў дзвярыма. Мы папрысутнічалі толькі на яго пачатку. Звярнула ўвагу, што пан маршалак прыехаў у Беларусь са сваёй перакладчыцай — прычым менавіта на беларускую мову.
Як даведаліся ад удзельнікаў сустрэчы, амаль усе прадстаўнікі беларускага боку гаварылі пра важнасць падтрымання тэлеканала «Белсат». У сваю чаргу, кіраўнік Сената запэўніў, што «Белсат» працягне сваё вяшчанне.
Цяпер чытаюць
«Я сказаў на відэа, што мяне не катуюць — на той момант гэта было праўдай. А праз дзве гадзіны мяне збілі». Украінскі журналіст два гады правёў у расійскім палоне — вось што ён перажыў11
Каментары