«Biełsat» pačnie aficyjnaje viaščańnie na «Siryjus-4» z žyvoha efiru «Basovišča»
18 lipienia a 18-j hadzinie mienskaha času «Biełsat» aficyjna raspačnie tranślacyju na spadarožniku «Siryjus-4». U toj ža dzień adbudziecca naŭprostavy efir z festyvalu muzyki maładoj Biełarusi «Basovišča».
18 lipienia a 18-j hadzinie mienskaha času «Biełsat» aficyjna raspačnie tranślacyju na spadarožniku «Siryjus-4». U toj ža dzień adbudziecca naŭprostavy efir z festyvalu muzyki maładoj Biełarusi «Basovišča».
Sioleta, 19 lipienia, upieršyniu ŭ historyi — u naŭprostavym efiry «Biełsatu» kancert laŭreataŭ «Basovišča-2008», a taksama hościa «Basoŭ» — hurta «Nejra Dziubiel».
Testavaja tranślacyja pieršaha niezaležnaha biełaruskaha spadarožnikavaha telekanału pačałasia 9 lipienia. Pašyrajučy tranślacyju na «Siryjus», «Biełsat» zastajecca na spadarožniku «Astra».
Pavodle sacyjalahičnych daśledavańniaŭ, praviedzienych naprykancy 2006 h., bolš za pałovu spadarožnikavych antenaŭ u Biełarusi skiravanyja na «Siryjus». Tranślacyja na najbolš papularny ŭ Biełarusi spadarožnik daje mahčymaść dostupu da prahramaŭ «Biełsatu» maksymalnaj kolkaści biełarusaŭ.
U suviazi z pačatkam pracy na «Siryjusie» z 18 lipienia adbudziecca źmiena ŭ prahramie «Biełsatu». Zamiest siońniašniaha 3-hadzinnaha bloku, jaki paŭtarajecca adzin raz, pieradačy «Biełsatu» buduć vychodzić u adnym 6-hadzinnym bloku z 18:00 da 24:10. Takaja formuła dazvolić dapasavać pieradačy «Biełsatu» da patrabavańniaŭ biełaruskich hledačoŭ i ŭzbahacić prahramu kanału.
Štodnia z paniadziełka da suboty paśla hałoŭnaha bloku navinaŭ (pieradača «Abjektyŭ»), jakija z 1 lipienia vychodziać sa studyi ŭ naŭprostavym efiry, prykładna a 21:10 u efiry budzie adna z najlepšych publicystyčnych prahramaŭ kanału (siarod ich — «Repartaž ź Biełarusi», «Hość «Biełsatu», «Kišenia», «Reparcior», «YoLife!», «Maju prava», «Chto jość kim?») abo dakumentalny film na histaryčnuju tematyku ci z raspoviedam pra tyja baki žyćcio Biełarusi, pra jakija niemahčyma daviedacca ź inšych telekanałaŭ.
Asablivuju ŭvahu zasłuhoŭvajuć dźvie publicystyčnyja pieradačy. U subotu — «Tydzień z radyjo «Svaboda», padrychtavany žurnalistami biełaruskaj słužby radyjo «Svaboda». Premjera pieradačy planujecca naprykancy žniŭnia. A ŭ niadzielu tradycyjna — temy, jakija datyčać bolšaści z nas, u tok-šou «Forum» z Eduardam Mielnikavym.
Adnačasova sa źmienaju ŭ prahramie, u efir pačnuć vychodzić dźvie pieradačy telekanału «Niamieckaja chvala» (Deutsche Welle): European Journal — telečasopis z aktualnymi repartažami z usioj Eŭropy na palityčnyja, sacyjalnyja i ekanamičnyja temy, a taksama Euromaxx — pieradača pra eŭrapiejski styl žyćcia, kulturu i adpačynak.
U piatnicu, subotu i niadzielu na «Biełsacie» — najlepšyja mastackija filmy i zabaŭlalnyja pieradačy, siarod jakich — «Žaŭtucha» i «Kuchnia».
Dadatkovaja infarmacyja ab prahramie budzie dastupnaja na sajcie telekanału.
Parametry Biełsata na Siryjusie: pazycyja 5° E , palaryzacyja H , častata 12 379,6 MHC
Kamientary