Kalinkavickaha aktyvista Dzianisa Rabianka, jaki napisaŭ zajavu na «Rehnum», praviarajuć pa artykule «Abraza prezidenta»
5 studzienia dadomu da kalinkavickaha aktyvista AHP Dzianisa Rabianka pryjšoŭ učastkovy milicyjanier. Im pravodzicca pravierka pa zajavie žychara pasiołka Mačuliščy Minskaha rajona Viačasłava Safronava ab tym, što ŭ publikacyjach Dzianisa Rabianka ŭ sacyjalnych sietkach prysutničajuć prykmiety abrazy kiraŭnika krainy.
«Byli pryviedzienyja cytaty z Ukantakcie, ale nie z majoj staronki. Učastkovy pytaŭsia, ci maju ja ŭ hetaj sacyjalnaj sietcy staronku. Skazaŭ, što maju, nazvaŭ adras. Paśla milicyjant pytaŭsia, ci źjaŭlajusia ja siabram apazicyjnych partyj i arhanizacyj. Na heta adkazaŭ, što nie zhodny z palitykaj ułady i krytykuju jaje, ale nie abražaju ni prezidenta, ni inšych słužbovych asobaŭ», — raskazaŭ «NN» Dzianis Rabianok.
Asoba čałavieka, jaki padaŭ zajavu na Rabianka, dastatkova cikavaja. Raniej jon pracavaŭ načalnikam adździeła kampjutarnych sietak i technałohij Akademii kiravańnia pry prezidencie. Safronaŭ trapiŭ u bujny skandał svaimi antysiemickimi vykazvańniami na roznych forumach. «Čamadan — vakzał — Aśviencim», — pisaŭ Safronaŭ adnosna habrejaŭ. Adnak milicyja tak i nie pakarała Safronava za tyja słovy.
Svaju tvorčaść Safronaŭ praciahvaje pa siońniašni dzień. U internecie jość niekalki sajtaŭ, dzie zhadany piersanaž beścić apazicyju i habrejaŭ.
Źviartaje ŭvahu, što mienavita Dzianis Rabianok byŭ aŭtaram skarh pa dziejnaści rasijskaha šavinistyčnaha sajta «Rehnum», u vyniku čaho pa kryminalnym artykule byli zatrymanyja Juryj Paŭłaviec, Dźmitryj Alimkin i Siarhiej Šyptenka.
«Paśla hetaha ŭ dačynieńni mianie byli dziasiatki pahroz, abiacali «zakapać» i h.d. Ja nie źviartaŭ uvahu, bo heta ž robicca ŭ internecie. Ciapier usio bolš surjozna. Ja pierakanany, što nie za prezidenta jany tak pieražyvajuć, a sprabujuć adpomścić za «rehnumaŭcaŭ», — miarkuje Rabianok.
Pakul Rabianok nie viedaje, jak budzie reahavać na ŭsio heta: «Budzie zaležyć ad taho, ci zaviaduć kryminalnuju spravu, ci pravierka ničym nie skončycca. Viny ŭ mianie nijakaj niama. Ja krytykavaŭ, ale nie abražaŭ».
Kamientary