Калінкавіцкага актывіста Дзяніса Рабянка, які напісаў заяву на «Рэгнум», правяраюць па артыкуле «Абраза прэзідэнта»
5 студзеня дадому да калінкавіцкага актывіста АГП Дзяніса Рабянка прыйшоў участковы міліцыянер. Ім праводзіцца праверка па заяве жыхара пасёлка Мачулішчы Мінскага раёна Вячаслава Сафронава аб тым, што ў публікацыях Дзяніса Рабянка ў сацыяльных сетках прысутнічаюць прыкметы абразы кіраўніка краіны.
«Былі прыведзеныя цытаты з Укантакце, але не з маёй старонкі. Участковы пытаўся, ці маю я ў гэтай сацыяльнай сетцы старонку. Сказаў, што маю, назваў адрас. Пасля міліцыянт пытаўся, ці з’яўляюся я сябрам апазіцыйных партый і арганізацый. На гэта адказаў, што не згодны з палітыкай улады і крытыкую яе, але не абражаю ні прэзідэнта, ні іншых службовых асобаў», — расказаў «НН» Дзяніс Рабянок.
Асоба чалавека, які падаў заяву на Рабянка, дастаткова цікавая. Раней ён працаваў начальнікам аддзела камп’ютарных сетак і тэхналогій Акадэміі кіравання пры прэзідэнце. Сафронаў трапіў у буйны скандал сваімі антысеміцкімі выказваннямі на розных форумах. «Чамадан — вакзал — Асвенцім», — пісаў Сафронаў адносна габрэяў. Аднак міліцыя так і не пакарала Сафронава за тыя словы.
Сваю творчасць Сафронаў працягвае па сённяшні дзень. У інтэрнэце ёсць некалькі сайтаў, дзе згаданы персанаж бэсціць апазіцыю і габрэяў.
Звяртае ўвагу, што менавіта Дзяніс Рабянок быў аўтарам скарг па дзейнасці расійскага шавіністычнага сайта «Рэгнум», у выніку чаго па крымінальным артыкуле былі затрыманыя Юрый Паўлавец, Дзмітрый Алімкін і Сяргей Шыптэнка.
«Пасля гэтага ў дачыненні мяне былі дзясяткі пагроз, абяцалі «закапаць» і г.д. Я не звяртаў увагу, бо гэта ж робіцца ў інтэрнэце. Цяпер усё больш сур’ёзна. Я перакананы, што не за прэзідэнта яны так перажываюць, а спрабуюць адпомсціць за «рэгнумаўцаў», — мяркуе Рабянок.
Пакуль Рабянок не ведае, як будзе рэагаваць на ўсё гэта: «Будзе залежыць ад таго, ці завядуць крымінальную справу, ці праверка нічым не скончыцца. Віны ў мяне ніякай няма. Я крытыкаваў, але не абражаў».
Каментары