Źnikłaha ŭ śniežni minułaha hoda 35-hadovaha žychara Mazyra znajšli žyvym i zdarovym u Amurskaj vobłaści Rasii.
Jak paviedamlaje adździeł infarmacyi i hramadskich suviaziaŭ (AIHS) UUS Homielskaha abłvykankama, žychar rajcentra źnik z domu 18 śniežnia 2016 hoda, uziaŭšy ciopłyja rečy i 150 rubloŭ. Baćka źnikłaha źviarnuŭsia pa dapamohu ŭ milicyju. Mužčynu abjavili ŭ vyšuk. Jon i raniej sychodziŭ z domu. Praź niekatory čas źnikłaha mazyranina abviaścili ŭ miždziaržaŭny vyšuk.
8 lutaha supracoŭnikam kryminalnaha vyšuku UUS Homielskaha abłvykankama patelefanavali kalehi z palicyi Amurskaj vobłaści Rasijskaj Fiederacyi i paviedamili, što źnikły mazyranin znajšoŭsia. Biełarusa zatrymali inśpiektary DPS, kali jon išoŭ pa aŭtadarozie Čyta — Chabaraŭsk, za 8.520 kiłamietraŭ ad domu. Jon raskazaŭ supracoŭnikam palicyi, što idzie ŭ Mahadan.
Vielizarny šlach mazyranin prarabiŭ pieššu i na spadarožnych mašynach.
Pavodle jaho słoŭ, asablivych prablem nie adčuvaŭ, ludzi dapamahali jamu — chto hrašyma, chto ježaj. Kancavy maršrut abraŭ nievypadkova. Kala vaśmi hadoŭ tamu jon pracavaŭ u Mahadanie. Mužčyna paviedamiŭ, što jašče tady, uražany pryhažościu pryrody i klimatam hetaha rehijonu, vyrašyŭ kali-niebudź tudy viarnucca. Hadami vynošvaŭ hetuju ideju i narešcie advažyŭsia ažyćciavić zadumanaje.
Rasijskija palicejskija, pierakanaŭšysia, što ŭ mužčyny ŭsio ŭ paradku, adpuścili jaho. «Napieradzie jaho čakaje doŭhaja daroha daŭžynioj amal u 4.000 kiłamietraŭ. Mahčyma, dasiahnuŭšy dalokaha rasijskaha horada, jon paviedamić svajakam, što žyvy, zdarovy i jakaja vakoł pryhažość», — adznačyŭ načalnik AIHS Vital Prystromaŭ.
Ciapier čytajuć
Inžyniera-kanstruktara z upraŭleńnia «Pielenha», jakoje robić techniku dla rasijskaha vojska, asudzili pa palityčnych artykułach3
Kamientary