Зніклага ў снежні мінулага года 35-гадовага жыхара Мазыра знайшлі жывым і здаровым у Амурскай вобласці Расіі.
Як паведамляе аддзел інфармацыі і грамадскіх сувязяў (АІГС) УУС Гомельскага аблвыканкама, жыхар райцэнтра знік з дому 18 снежня 2016 года, узяўшы цёплыя рэчы і 150 рублёў. Бацька зніклага звярнуўся па дапамогу ў міліцыю. Мужчыну аб'явілі ў вышук. Ён і раней сыходзіў з дому. Праз некаторы час зніклага мазыраніна абвясцілі ў міждзяржаўны вышук.
8 лютага супрацоўнікам крымінальнага вышуку УУС Гомельскага аблвыканкама патэлефанавалі калегі з паліцыі Амурскай вобласці Расійскай Федэрацыі і паведамілі, што зніклы мазыранін знайшоўся. Беларуса затрымалі інспектары ДПС, калі ён ішоў па аўтадарозе Чыта — Хабараўск, за 8.520 кіламетраў ад дому. Ён расказаў супрацоўнікам паліцыі, што ідзе ў Магадан.
Велізарны шлях мазыранін прарабіў пешшу і на спадарожных машынах.
Паводле яго слоў, асаблівых праблем не адчуваў, людзі дапамагалі яму — хто грашыма, хто ежай. Канцавы маршрут абраў невыпадкова. Каля васьмі гадоў таму ён працаваў у Магадане. Мужчына паведаміў, што яшчэ тады, уражаны прыгажосцю прыроды і кліматам гэтага рэгіёну, вырашыў калі-небудзь туды вярнуцца. Гадамі выношваў гэтую ідэю і нарэшце адважыўся ажыццявіць задуманае.
Расійскія паліцэйскія, пераканаўшыся, што ў мужчыны ўсё ў парадку, адпусцілі яго. «Наперадзе яго чакае доўгая дарога даўжынёй амаль у 4.000 кіламетраў. Магчыма, дасягнуўшы далёкага расійскага горада, ён паведаміць сваякам, што жывы, здаровы і якая вакол прыгажосць», — адзначыў начальнік АІГС Віталь Прыстромаў.
Каментары