Minski hurt Re1ikt źniaŭ muzyčnaje videa da kampazicyi «Drobnieńki doždžyk», stvoranaj pavodle narodnaj pieśni, jakuju lubiŭ śpiavać biełarucki pieśniar Ryhor Baradulin.
Data vychadu klipa nievypadkovaja: 24 lutaha Baradulinu spoŭniłasia b 82 hady.
Bolšaść viedaje Ryhora Baradulina tolki jak paeta, miž tym jon byŭ viadomym źbiralnikam biełaruskaha falkłoru, sapraŭdnym patryjotam svajoj małoj radzimy — Vušaččyny (Viciebskaja vobłaść). Mnostva piesień jon zapisaŭ ad svajoj maci Akuliny, jakaja pryščapiła synu luboŭ da rodnaj movy i kultury. Liryčny napieŭ «Drobnieńki doždžyk» byŭ adnym ź jaje lubimych.
«Heta cudoŭnaja kampazicyja, — kaža Alaksandr Dziemidzienka, lidar hurtu Re1ikt, jaki stvaryŭ svaju aryhinalnuju viersiju «Doždžyka». — Jana stała bolš sučasnaj, ekspresiŭnaj, ale nie straciła miakkaści. My źmiašali vals i rok — atrymałasia śvieža i niezvyčajna. Kamuści padasca dziŭnym, što ŭ repiertuary brutalnych rokieraŭ źjaviłasia takaja pieśnia, a nam chaciełasia b razburyć stereatyp: mužčyna taksama moža być piaščotnym i ŭvažlivym, kali jon zakachany».
Dla taho kab raspavieści historyju kachańnia, prydumanuju napačatku 20 stahodździa, muzyki vyrašyli ŭznavić atmaśfieru taho času. Našy pradziedy i prababuli čaściej byli vymušanyja padparadkoŭvacca voli baćkoŭ, čym pokliču ŭłasnych sercaŭ, ale heta zusim nie značyć, što kachali tady mienš, naadvarot, dramatyzm i žarści viravali nie aby-jakija.
Razyhrać luboŭnuju trahiedyju byli zaprošany prafiesijny akcior i dyrektar siarednieviečnaha teatra «DyHryza», trenier pa publičnych vystupach kampanii Epam Alaksiej Burnosienka, a taksama paetka, madel i śpiavačka Kaciaryna Vadanosava.
Akramia hetaha, historykami byŭ padabrany rekvizit, adpaviedny eposie, bolš za toje, śpiecyjalna dla zdymak rekanstrujavali i sšyli kašulu hałoŭnaha hieroja. Dla poŭnaha pahružeńnia klip było vyrašana zdymać u muziei narodnaj architektury i pobytu ŭ Stročycy, dzie pad adkrytym niebam raźmiaščajucca staražytnyja biełaruskija chaty, staradaŭnija haspadarčyja pabudovy i młyn.
Mienavita ŭ takim unikalnym łandšafcie i razhortvajecca detektyŭna-mieładramatyčny siužet, jaki ŭvasobiŭ u žyćcio apieratar i režysior Ihar Husieŭ, darečy, u minułym muzyka hurtu «Daj Darohu!», a ciapier kiraŭnik studyi pa vytvorčaści fota- i videapradukcyi.
«Nam doŭhi čas chaciełasia źniać prafiesijnaje videa na dobruju kamieru, pakazać biełaruskuju pryhažość, sapraŭdnyja emocyi. I narešcie heta atrymałasia. Jašče raz havorym dziakuj našym słuchačam, jakija ŭziali ŭdzieł u kraŭdfandynhavaj kampanii i dapamahli ŭbačyć śviet «Drobnieńkamu doždžyku» — u im jość i vašyja kropli!» — dadaje Alaksandr Dziemidzienka.
Nahadajem, na płatformie Talaka muzyki Re1ikt sabrali na vydańnie alboma «Kufar» amal utraja bolš srodkaŭ, čym płanavali, a tamu nie tolki zmahli vypuścić dysk, ale taksama źniać klip.
Kampazicyja «Drobnieńki doždžyk» uvajšła i ŭ CD-prajekt «Pieśni matčyny z Vušaččyny». Pačuć jaje žyŭcom možna budzie na prezientacyi zbornika baradulinskich piesień 26 lutaha ŭ Pałacy vieteranaŭ, a taksama ŭ kłubie Hrafici 11 sakavika na solnym kancercie Re1ikt, dzie muzyki pradstaviać akustyčnyja interpretacyi kampazicyj z novaha dyska.
Re1ikt — hurt, jaki pracuje ŭ kirunku world music, cpałučajučy tradycyjny biełaruski piesienny falkłor z aktualnymi rok-kirunkami. U kampazicyjach kamandy źnitavalisia paleski šamanizm, aŭtentyčny drajv i tajamničy biełaruski kosmas. Kalektyŭ źjaŭlajecca ŭładalnikam šerahu muzyčnych uznaharod u Polščy i Biełarusi, vystupaŭ va Ukrainie, Litvie, Rasii.
Ivan Prus raskazaŭ, jak nažyŭsia na $200, pasialiŭšy kinazorku ŭ zaniadbanaj kvatery kala śmietnika ŭ Šabanach, abstaŭlenaj rečami ź jaho internata1616
Ivan Prus raskazaŭ, jak nažyŭsia na $200, pasialiŭšy kinazorku ŭ zaniadbanaj kvatery kala śmietnika ŭ Šabanach, abstaŭlenaj rečami ź jaho internata16
Topavy pierakładčyk pajechaŭ u Biełaruś mianiać pašpart — i sieŭ za danaty. «KDB pahladzieŭ na sumu i vyrašyŭ, što nichto ŭ zdarovym rozumie nie moža vydatkavać stolki ŭłasnych hrošaj»1313
Kamientary