Sudździa paškadavaŭ kileraŭ: vyniesieny prysud padručnym aktyvistki BRSM
16 śniežnia 2015 hoda ŭ kvatery pa vulicy Alibiehava znajšli cieły dvuch maładych ludziej: chłopca i dziaŭčynu žorstka zabili nažom. 6 sakavika 2017 hoda sud pastaviŭ kropku ŭ spravie.
Nieŭzabavie paśla zabojstva śledčyja znajšli padazravanych. Vyśvietliłasia, što eks-siabroŭka zabitaha — 27-hadovaja Alina Šulhanava - naniała dvuch znajomych, kab tyja «dapamahli» joj adnavić znosiny z bojfrendam.
Paśla praciahłaj «Santa-Barbary» (para to žyła razam, to razychodziłasia, peŭny čas maładyja ludzi žyli «šviedskaj siamjoj», utraich z toj samaj supiernicaj) Šulhanava vyrašyła siłavym mietadam viarnuć kachańnie.
Zhodna ź jaje płanam, mužčyny pavinny byli źbić novuju siabroŭku chłopca, kab taja trapiła ŭ balnicu. Pakul taja b lačyłasia, dziaŭčyna źbirałasia viarnuć svajho byłoha kachanka.
Ale jaje najmity zarezali i chłopca, i jaho novuju dziaŭčynu. Na sudzie stała viadoma, što za dzień da hetaha jany zabili jašče adnaho mužčynu.
6 sakavika ŭ Minskim haradskim sudzie byŭ ahučany prysud traim abvinavačanym.
Padčas sudovych sprečak prakuror Natalla Piatroŭskaja patrabavała rastralać Sucharku i Žylnikava, a Šulhanavu asudzić na 15 hadoŭ.
Ale sudździa Maksim Łapko vynies miakčejšy prysud.
Alina Šulhanava atrymała 12 hadoŭ u kałonii ahulnaha režymu plus kanfiskacyju majomaści.
Jaje «kilery», 23-hadovy Viačasłaŭ Sucharka i 44-hadovy Alaksandr Žylnikaŭ asudžanyja na pažyćciovaje źniavoleńnie va ŭmovach asablivaha režymu. Majomaść ich budzie kanfiskavanaja.
Akramia taho Viačasłava Sucharku ŭ kałonii buduć prymusova lačyć ad ałkahalizmu.
Taksama abvinavačanyja pavinny buduć spłacić paciarpiełym (svajakam zabitych) trochi bolš za 200 tysiač rubloŭ kampiensacyi maralnaj i materyjalnaj škody.
«My raźličvali na bolš žorstkaje pakarańnie», — praź ślozy kaža Zinaida, adna z paciarpiełych pa spravie. Heta jaje brata Sucharka i Žylnikaŭ zabili ŭ Kałodziščach za dzień da raźni ŭ kvatery na Alibiehava.
Žančyna ličyć, što sudździa paškadavaŭ zabojcaŭ. Jana kaža, što spadziavałasia na śmiarotnaje pakarańnie chacia b dla adnaho z abvinavačanych.
Čytajcie taksama:
Kamientary