Źmicier Daškievič zatrymany prosta padčas strymu, jaho asudzili na troje sutak
Daškievič asudžany na troje sutak.
Momant zatrymańnia źjaviŭsia ŭ fejsbuku aktyvista.
Daškieviča zatrymali ŭ toj momant, kali jon vychodziŭ z ofisa Partyi BNF na vulicy Čarnyšeŭskaha ŭ Minsku. Na tratuary da jaho padyšła dziaŭčyna ŭ cyvilnym, nazvałasia supracoŭnicaj milicyi — i ŭ toj ža momant aktyvista «skrucili» niejkija mužčyny. Na hetym tranślacyja abarvałasia.
Za Daškievičam ŭžo niekalki dzion sačyŭ sini mikraaŭtobus.
«Byŭ na kuchni, jak pačuŭ ź inšaha boku doma kryki: «Ludzi, ratujcie! Bandyty!» Kali padbieh da vakna, to pabačyŭ, što čałavieki čatyry-piać vałtuzajuć pa ziamli i sprabujuć adarvać taho, chto kryčaŭ, ad drevaŭ. Razhladzieć, chto heta, było niemahčyma, ale nie ciažka było zdahadacca, — piša ŭ svaim fejsbuku Juraś Hubarevič. —
Vidavočna, što Źmicier supraciŭlaŭsia praciahły čas, bo vakoł sabraŭsia nievialiki natoŭp minakoŭ. Ludziej u formie nie było. Mašyny biez apaznavalnych znakaŭ. Usio heta vyhladała na sapraŭdny bandycki napad i kidnepinh».
Paźniej žonka Daškieviča Nastaśsia napisała ŭ fejsbuku, što Źmitra znajšli ŭ sudzie Savieckaha rajona. Jana paviedamiła, što ŭ jaho skrali telefon, źbivali, i, nadzieŭšy kajdanki, kinuli da suda ŭ mašynie.
Paśla 16:00 pačaŭsia sud.
Daškieviča vinavaciać pavodle piaci artykułaŭ Administracyjnaha kodeksa, u tym liku ŭ chulihanstvie i parušeńni zakonu ab masavych mierapryjemstvach. Pavodle pratakołaŭ, Daškievič nibyta akazvaŭ supraciŭ milicyjantam pry zatrymańni i ŭźlez na traktar padčas abarony Kurapataŭ. Taksama jaho vinavaciać u parušeńni paradku praviadzieńnia masavych mierapryjemstvaŭ — za vystaŭleńnie namiota na budaŭničaj placoŭcy, za pikietavańnie i za mitynh u Kurapatach.
Sudździa admoviŭsia vieści praces pa-biełarusku, zabaraniŭ žurnalistam videazdymki i admoviŭsia razhladać videazapis zatrymańnia. Źmicier Daškievič skazaŭ, što sudu nie daviaraje, ale mianiać sudździu niama sensu, piša Radyjo Svaboda.
Jak paviedamiŭ Raman Vasiljeŭ u svaim fb, Daškievič asudžany na troje sutak.
Aktyvista asudzili pa art. 23.34, pa artykule 17.1 sudździa pryniaŭ rašeńnie jaho apraŭdać.
Sam Daškievič zajaviŭ, što čakaŭ atrymać bolš. Na volu aktyvist vyjdzie ŭ paniadziełak, 13 sakavika.
Ciapier čytajuć
«Kab kupić dom, pracavała na narkazavodzie». Paśla 2020-ha biełaruska ź piaćciu dziećmi pierajechała ŭ Kanadu4
«Kab kupić dom, pracavała na narkazavodzie». Paśla 2020-ha biełaruska ź piaćciu dziećmi pierajechała ŭ Kanadu
«Adpraŭlali myć tualety i kidali ŭ ŠIZA». Susiedki raskazali pra abychodžańnie ŭ kałonii z eks-palitźniavolenaj Tamaraj Karavaj, jakaja paśla pamierła44
Kamientary