Asacyjacyja vyličalnaj techniki (ACM) nazvała łaŭreatam premii Ćjurynha (Turing Award) 2016 hoda brytanskaha navukoŭca Cima Bierniersa-Li — adnaho z vynachodnikaŭ internetu ŭ jaho sučasnym vyhladzie. Pra heta piša vydańnie N+1 sa spasyłkaj na ACM.
Aficyjnaje ŭznaharodžańnie projdzie 24 červienia ŭ San-Francyska, padčas śviatkavańnia 50-hodździa premii Ćjurynha.
61-hadovy Cimaci Džon Bierniers-Li skazaŭ u intervju ahienctvu Associated Press, što vielmi ŭdziačny za premiju, nazvaŭšy jaje sapraŭdy «karaleŭskaj uznaharodaj».
«Ja liču, što heta ŭznaharoda ŭ pieršuju čarhu samomu prajektu pa stvareńni Suśvietnaj pavuciny, a taksama hłabalnaha mižnarodnaha duchu supracoŭnictva i ŭsim tym, chto dałučyŭsia, kab dapamahčy mnie», — zajaviŭ navukoviec.
Cimaci Džon Bierniers-Li — prafiesar Oksfardskaha ŭniviersiteta i Masačusieckaha technałahičnaha instytuta. Mienavita Bierniers-Li (razam ź bielhijskim śpiecyjalistam Robiertam Kajo) stvaryŭ internet-technałohiju World Wide Web, jakaja siońnia viadomaja jak Suśvietnaja pavucina. Bierniers-Li taksama źjaŭlajecca vynachodnikam šerahu klučavych internet-pratakołaŭ i moŭ, uklučajučy HTTP, HTML i URL.
U 2004 hodzie karaleva Vialikabrytanii Lizavieta II paśviaciła Bierniersa-Li ŭ rycary-kamandory. Časopis Time uklučyŭ navukoŭca ŭ top-100 samych vybitnych ludziej XX stahodździa.
Premija Ćjurynha źjaŭlajecca samaj značnaj uznaharodaj u infarmatycy. Jaje ŭručaje Asacyjacyja vyličalnaj techniki za vybitny navukova-techničny ŭkład u hetaj halinie. Zasnavanaja premija ŭ honar anhlijskaha navukoŭca Ałana Ćjurynha. U śfiery infarmacyjnych technałohij premija Ćjurynha maje status, padobny da Nobieleŭskaj premii ŭ akademičnych navukach. Upieršyniu jana była prysudžanaja ŭ 1966 hodzie Ałanu Pierlisu za raźvićcio technałohii stvareńnia kampilataraŭ. Sponsaram uznaharody źjaŭlajecca karparacyja Google, jaje hrašovy ekvivalent — $1 młn.
Ciapier čytajuć
U Poznani hiniekołah vydaliŭ 24‑hadovaj biełaruscy matku i jaječniki bieź jaje zhody. Jamu pahražaje da 20 hadoŭ turmy12
Kamientary