Ukraincy prajšli 15 kiłamietraŭ pad ziamloj u tył rasijan. Što viadoma pra apieracyju «Viales»

Rasijskija vajskoŭcy nie raz vykarystoŭvali padziemnyja kamunikacyi dla abychodu ŭkrainskaj abarony. Tak było pad Aŭdziejeŭkaj i ŭ Kurskaj vobłaści. Padobnuju taktyku rasijanie ŭžyvali i kala Kupianska na Charkaŭščynie, dzie mahistralny hazapravod prachodzić pad rakoj Askoł.

Ź leta 2025 hoda rasijskija vajskoŭcy vykarystoŭvali hazapravod, jaki prachodzić pad rakoj Askoł, kab pierabiracca na jaje pravy bierah. Jany vychodzili z truby na poŭnač ad Kupianska, nazapašvali siły ŭ navakolnych lasach, a zatym sprabavali praniknuć u horad.

Ukrainskija vojski nanosili ŭdary pa hazapravodzie i brali jaho vychady pad ahniavy kantrol. Adnak całkam pazbavić rasijan mahčymaści karystacca padziemnym maršrutam było składana. Urešcie ŭkraincy sami pačali prasoŭvacca pa hazapravodzie, kab vycieśnić adtul praciŭnika.

Tak pačałasia apieracyja «Viales», jakuju ažyćciaŭlaje hrupoŭka pad kamandavańniem 2‑ha korpusa Nacyjanalnaj hvardyi Ukrainy «Chartyja». Svaju nazvu apieracyja atrymała nazvu ŭ honar boha padziemnaha śvietu ŭ słavianskaj mifałohii, jakoha taksama źviazvali z mudraściu i chitraściu.

Bai ŭ hazapravodzie pad Kupianskam

Jak piša  «Ukrainskaja praŭda», ukrainskija vajskoŭcy spuścilisia ŭ mahistralnuju hazavuju trubu dyjamietram kala 1,2 mietra i pačali vyciaśniać adtul rasijan. Na asobnych učastkach davodziłasia vieści strałkovyja bai niepasredna pad ziamloj. Pavodle surazmoŭcy vydańnia, z bajami ŭkraincy prajšli niekalki kiłamietraŭ.

Pradstaŭnik «Chartyi» Uładzimir Dziehciaroŭ raskazaŭ, što apieracyja doŭžycca ŭžo kala paŭhoda. Pry hetym vajskoŭcy nie prosta pieramiaščajucca pa trubach, ale i viaduć tam paŭnavartasnyja bai z vykarystańniem ciažkaha ŭzbrajeńnia i robataŭ.

Dla hetaha spatrebiłasia asablivaja padrychtoŭka. U navučalnym centry «Chartyi» navat pabudavali trenažor, jaki imituje padziemny tunel. Na im bajcy vučylisia dziejničać i vajavać u ciesnaj prastory. Pad ziamloj niama spadarožnikavaj navihacyi i stabilnaj radyjosuviazi, a zabieśpiačeńnie ludziej patrabuje składanych inžyniernych rašeńniaŭ.

Apieracyja nie abmiažoŭvajecca dziejańniami pad ziamloj. Jany skaardynavanyja z atakami na pavierchni i ŭdarami bieśpiłotnikaŭ. Akramia bryhady «Chartyja», u joj udzielničajuć šturmavy połk «R.U.H.», połk bieśpiłotnych sistem «Łava», padraździaleńni ŭkrainskaj vajennaj raźviedki, u tym liku lehijon «Svaboda Rasii» i Ruski dobraachvotnicki korpus, a taksama bryhada bieśpiłotnych sistem «Achiles».

Rasijanie paśpieli abstalavać pad ziamloj składy, blindažy i miescy dla adpačynku. Pavodle rasijskich pałonnych, vadu, ježu i inšyja prypasy dastaŭlali da pazicyj na nievialikich kalaskach. Na asobnych učastkach hazapravoda vykarystoŭvali navat elektrasamakaty.

Padčas nastupleńnia ŭkraincam udałosia zabłakavać adnu z rasijskich hrup u hazapravodzie. Jaje ŭdzielniki apynulisia adrezanymi ad asnoŭnych sił, a ŭdary ŭkrainskich bieśpiłotnikaŭ uskładniali sproby naładzić zabieśpiačeńnie.

Jak paviedamlaje «Suśpilnie Charkiv», niekatoryja z pałonnych rasijan raskazali, što praviali ŭ błakadzie kala paŭtara miesiaca. Zapasy ježy ŭ ich skončylisia, a vadu davodziłasia źbirać z łužyn u trubie, filtravać i kipiacić. Kali pačali zakančvacca i bojeprypasy, hrupa pahadziłasia zdacca.

Pavialičyć

Pieršyja vyniki apieracyi «Viales»

Pavodle pradstaŭnikoŭ «Chartyi», praviadzieńnie apieracyi dazvoliła pazbavić rasijskija vojski padziemnaha maršrutu, jakim jany bolš za hod karystalisia dla praniknieńnia na pravy bierah Askoła. Pry hetym bajavyja dziejańni praciahvajucca, a ŭkrainskim vajskoŭcam davodzicca ŭličvać isnavańnie inšych padziemnych kamunikacyj u rajonie Kupianska.

27 kastryčnika pra chod apieracyi i jaje pieršyja vyniki prezidentu Ukrainy Uładzimiru Zialenskamu dałažyli hałoŭnakamandujučy USU Michaił Drapaty, kamandzir «Chartyi» Ihar Abalenski i namieśnik kiraŭnika Ofisa prezidenta Pavieł Palisa.

Pavodle ahučanych źviestak, ukrainskija vajskoŭcy prasunulisia pad ziamloj bolš jak na 15 kiłamietraŭ, źniščyli zvyš 100 rasijskich sałdat i ŭziali ŭ pałon jašče 30. 

U viačernim zvarocie 27 kastryčnika Zialenski nazvaŭ «Viales» treciaj znakavaj apieracyjaj ukrainskich vojskaŭ u 2026 hodzie. Pieršym było nastupleńnie desantna-šturmavych vojskaŭ, padčas jakoha, pavodle jaho słoŭ, było vyzvalena bolš za 800 kvadratnych kiłamietraŭ terytoryi ŭ Zaparožskaj i Dnieprapiatroŭskaj abłaściach. Druhoj — apieracyju «Vivaldzi» na Danieččynie, dzie ŭkrainskaje kamandavańnie viarnuła pad kantrol bolš za 200 kvadratnych kiłamietraŭ.

Na dumku Zialenskaha, «Viales» umacoŭvaje ŭkrainskija pazicyi i pakazvaje, što rasijskaj armii pakul nie ŭdałosia dasiahnuć pastaŭlenych pierad joj met pad Kupianskam.

• 0
• 0
• 0
• 0
• 0
• 0
• 0
• 0