20 krasavika stała viadoma pra zatrymańnie jašče adnaho biełaruskaha biznesoŭca. Na hety raz byŭ zatrymany Ernest Alaksiejeŭ, bujny pastaŭščyk biełaruskaj techniki ŭ Turkmienistan.
«Naša Niva» padsumavała ŭsiu viadomuju pra Alaksiejeva infarmacyju.
Yaraw — značyć «mahutny»
49-hadovy Erniest Alaksiejeŭ — suzasnavalnik i hienieralny dyrektar chołdynha «Yaraw», jaki z 1997 hoda pracuje ŭ Turkmienistanie. U pierakładzie z turkmienskaj movy «Yaraw» značyć «mahutny».
Kampanija — aficyjny dyler vyrablenaj u SND techniki, u tym liku «MAZa», «Amkadora», «BiełAZa» i pradukcyi inšych zavodaŭ, u tym liku i rasijskich.
Akramia taho, Alaksiejeŭ — člen stvoranaha ŭ 2008 hodzie rasijska-turkmienskaha Dziełavoha savieta, kudy ŭvachodzić 77 biznesoŭcaŭ. Saviet — niekamiercyjnaja arhanizacyja, asnoŭnaj metaj jakoj źjaŭlajecca abjadnańnie namahańniaŭ i kaardynacyja dziejańniaŭ pradprymalnickich kołaŭ Rasii i Turkmienistana.
Pracavaŭ sa stvaralnikam «Jo-mabila»
Kampanija Yaraw vyjšła ź viadomaj hrupy «Jaravit», zasnavanaj Andrejem Birukovym i jaho partniorami. Birukoŭ — viadomy biełaruski biznesoviec, jaki pastupova pieravioŭ svaju dziejnaść u Rasiju.
U 2010 hodzie Michaił Procharaŭ zacikaviŭsia raspracavanaj biełaruskimi śpiecyjalistami, jakija pracavali ŭ Birukova ŭ «Jaravit motars», idejaj hibrydnaha aŭtamabila. Tak źjaviŭsia prajekt «jo-aŭta». Kampanija Birukova atrymała ŭ «Haradskim aŭtamabili» dolu ŭ 49%, kantrol zastaŭsia za strukturami Procharava.
Płany pačać sieryjny vypusk pastajanna mianialisia. U 2014 hodzie Andrej Birukoŭ byŭ źniaty z pasady kiraŭnika prajekta, a ŭ pačatku 2014 hoda byŭ začynieny i sam prajekt. Viasnoj 2014 hoda asnoŭny ŭładalnik «jo-aŭta», hrupa «ONEKSIM», za 1 jeŭra pieradała ŭsie technałohii dziaržaŭnamu Centralnamu navukova-daśledčamu aŭtamabilnamu i aŭtamatornamu instytutu.
U kancy 90-ch Birukoŭ taksama byŭ členam savieta dyrektaraŭ zavoda «Mašynabudaŭnik» u Vaskrasiensku, što ŭ Padmaskoŭi. Jon byŭ i akcyjanieram, mieŭ 5%. Taksama akcyjanieram, i taksama z 5%, byŭ i Alaksiejeŭ.
«Bentli» za $600 tysiač zhareła paśla DTZ
Uletku 2013 hoda Ernest Alaksiejeŭ trapiŭ u rezanasnuju avaryju. Na trasie, jakaja viadzie ŭ Nacyjanalny aeraport, «Bentli» biznesoŭca lacieŭ na vialikaj chutkaści i ŭrezaŭsia ŭ stary «Falksvahien Pasat», što razvaročvaŭsia praz raździalalnuju zonu. Paśla ŭdaru «Bentli» urezaŭsia jašče ŭ try mašyny i zahareŭsia. Na ščaście, u avaryi nichto nie paciarpieŭ. Pa słovach vidavočcaŭ avaryi, pakinuŭšy mašynu, biznesmien sieŭ na mietaličny adbojnik i staŭ pić sok z pakieta, hledziačy, jak daharaje «Bentli».
Elitnaja mašyna zhareła całkam. Jana była nabytaja ŭ Ryzie ŭ aficyjnaha dystrybutara ŭ kancy 2009 hoda za 660 tysiač dalaraŭ: 530 tysiač kaštavaŭ sam aŭtamabil, jašče 130 tysiač syšło na dapracoŭku interjeru, źniešniaha vyhladu i matora.
Darečy, vinavatym u avaryi pryznali 21-hadovaha studenta, kiroŭcu «Falksvahiena». Jaho pazbavili pravoŭ na hod. A ŭ dačynieńni da Alaksiejeva administracyjnaja vytvorčaść navat nie pačynałasia.
Susied Čyža
U staličnym domie z samymi vysokimi koštami — tak zvanym «Domie Čyža» — nabyŭ sabie žyllo i Alaksiejeŭ.
Najmienšaja pa pamiery kvatera tut — adnapakajovaja kvatera płoščaj kala 65 m2. Jaje košt składaje $200 tysiač.
Dakładny pamier kvatery Ernesta Alaksiejeva nieviadomy. Ale susied biznesoŭca — sam Čyž. Jaho kvatera płoščaj bolš za 300 m2 pierapisanaja na žonku, dyrektara fitnies-centra Evo — Śviatłanu Čyž.
Za što zatrymali?
Śledčy kamitet paviedamiŭ, što Alaksiejeŭ — padazravany pa spravie ab pryčynieńni majomasnaj škody biez prykmiet kradziažu, jakuju ździejśniła hrupa asob pa papiaredniaj zmovie.
Uletku 2014 hoda tahačasny premjer-ministr Michaił Miaśnikovič i prezident Turkmienistana damovilisia pabudavać servisny centr u Ašchabadzie. Płanavałasia, što ŭ centry buduć pradavać i absłuhoŭvać biełaruskuju techniku, handlavać zapčastkami i rychtavać kadry (kiroŭcaŭ, miechanikaŭ, elektrykaŭ).
Ahulnaja terytoryja centra składała 22 tys. kv. m. Košt prajektu aceńvaŭsia ŭ 10,5 młn dalaraŭ. Zdać centr płanavałasia ŭ śniežni 2015 hoda.
Taksama Alaksiejeŭ kazaŭ, što siervisnyja centry pa absłuhoŭvańni biełaruskaj techniki realna stvaryć u kožnym rehijonie Turkmienistana.
Ale ž centr u Ašchabadzie i pa siońnia nie dabudavany ŭ poŭnym abjomie.
A Ernestu Alaksiejevu ciapier pahražaje da 5 hadoŭ.
«Zabudźcie hety numar nazaŭsiody»
Kamientavać zatrymańnie Alaksiejeva nie chočuć ani svajaki, ani supracoŭniki kampanii Yaraw.
Baćki biznesoŭca paraili «Našaj Nivie» «zabyć ich telefonny numar nazaŭsiody».
U turkmienskaj kampanii Yaraw «Našaj Nivie» paviedamili, što zatrymańnie Alaksiejeva jany nie kamientujuć.
Ciapier čytajuć
Ministr suviazi: Abmiežavańni mabilnaha internetu zakranuć 1,7 miljona biełarusaŭ1
Kamientary