«Nam pastajanna kažuć: sačycie za haradavym!» — sałdaty, jakija zatrymlivali Kasinierava, dajuć pakazańni ŭ sudzie

U sudzie Maskoŭskaha rajona Minska pačaŭsia praces pa spravie Viačasłava Kasinierava, anarchista, jaki 12 sakavika nakinuŭ piatlu na pomnik carskamu haradavomu.

Pavialičyć

Adrazu paśla akcyi Kasinieraŭ byŭ zatrymany. Jon byŭ asudžany na 15 sutak, ale nie za akcyju z pomnikam, a za ŭdzieł u «Maršy aburanych biełarusaŭ», jaki prajšoŭ amal miesiac tamu, 17 lutaha. Viačasłava pryznali vinavatym u parušeńni zakona ab masavych mierapryjemstvach.

Akramia taho padčas suda Kasinieravu vydali pastanovu ab zatrymańni pa niepasredna ŭźnikłym padazreńni pa artykule ab chulihanstvie.

Pavialičyć

Chłopca pakinuli pad vartaj paśla adbyćcia sutak. Vyjšaŭ jon tolki 21 krasavika, kali miera strymańnia była źmieniena na padpisku ab niavyjeździe.

I voś ciapier vyrašajecca ci budzie Kasinieraŭ pakarany za «apahańvańnie» pomnika. Maksimalnaje pakarańnie, jakoje pahražaje Viačasłavu — da 3 hadoŭ pazbaŭleńnia voli.

Pavialičyć

Sam Kasinieraŭ pierad pasiadžeńniem skazaŭ, što vinu pryznavać nie źbirajecca. 

«Ale ž vinavatym mianie pryznajuć, kaniečnie. Što ž tyčycca vyraku — nie viedaju. Naŭrad ci mianie vypuskali, kab paśla iznoŭ zakryć… Ale pahladzim. Ja hatovy da luboha prysudu», — skazaŭ chłopiec.

Na pačatku pasiadžeńnia advakat Anton Hašynski paprasiŭ sudździu dałučyć da spravy skrynšoty z sajtaŭ «Naša Niva» i «Biełsat» z navinami ab učynku Kasinierava i kamientami da ich, bo jany «adlustroŭvajuć hramadskaje mierkavańnie». Sudździa Alaksandr Pietraš chadajnictva advakata zadavoliŭ.

Paśla Jaŭhien Sierakoŭ, starejšy pamočnik prakurora Maskoŭskaha rajona Minska, začytaŭ abvinavačvańnie, zhodna ź jakim Kasinieraŭ, «dziejničajučy z asablivym cynizmam, supraćpastaŭlajučy siabie hramadstvu, zaciahnuŭ piatlu na šyi skulptury, paśla čaho nanios dva ŭdary rukoj pa hałavie skulptury».

Kasinieraŭ, jak i abiacaŭ, vinu ŭ chulihanstvie nie pryznaŭ. Ale nie staŭ admaŭlać, što heta jon nakinuŭ tuju piatlu, i patłumačyŭ, čamu jon tak zrabiŭ:

«Da hetaha praciahły čas prachodzili padziei, źviazanyja ź biasčynstvami i praźmiernym hvałtam z boku supracoŭnikaŭ orhanaŭ. Prachodzili žorstkija zatrymańni, u tym liku i anarchistaŭ, kali ludzi prosta źnikali i paśla ŭžo stanaviłasia zrazumieła, što jany zatrymanyja milicyjaj. Takoje ja raniej bačyŭ tolki ŭ filmach pra bandytaŭ z 90-ch.

Ja vyrašyŭ vykazać svoj pratest suprać hvałtu i biezzakońnia».

Uvohule, sam chłopiec nazvaŭ svaje dziejańni «pierformansam».

Prakuror pacikaviŭsia, dzie Viačasłaŭ nabyŭ viaroŭku, jak prynios jaje, na jakim miescy skulptury zaciahnuŭ. Paśla spytaŭ, ci byli niejkija jašče dziejańni.

Kasinieraŭ paviedamiŭ, što dva razy pachłopaŭ pa «tvary» skulptury, kab «zamacavać vobraz».

«Jaki vobraz vy chacieli nadać i ŭ čym była nieabchodnaść pachłopvańnia?» — spytaŭ sudździa.

«Ja chacieŭ nadać skulptury vobraz karnika».

Pavialičyć

Prakuror pasprabavaŭ vyśvietlić, jak Viačasłaŭ stavicca da skulptury haradavoha.

«Heta skulptura palicejskaha časoŭ Rasijskaj Impieryi. Hetaja pasada nosić represiŭny charaktar u dačynieńni da Biełarusi», — skazaŭ Kasinieraŭ.

«Ale ž ahulnaja meta ŭ palicyi jakaja?» — spytaŭ prakuror.

«Sprečnaje pytańnie», — adkazaŭ chłopiec.

Paśla pakazańniaŭ abvinavačvanaha vysłuchali śviedkaŭ. Pieršym byŭ Ivan Siemianienka, sałdat terminovaj słužby z unutranych vojskaŭ. Siemianienka achoŭvaje budynak MUS pobač sa skulpturaj haradavoha.

Jon raspavioŭ, što padčas niasieńnia słužby bačyŭ «pierformans» Kasinierava, a paśla i zatrymlivaŭ chłopca.

«Skažycie, a chto vam daŭ zadańnie pryhladvać za skulpturaj haradavoha?» — pacikaviŭsia advakat.

«Nam pastajanna ŭsie pra heta kažuć — sačyć!» — adkazaŭ śviedka.

Dźmitry Bułhak, taksama sałdat terminovaj słužby, faktyčna paŭtaryŭ pakazańni papiaredniaha śviedki: nieznajomy padyšoŭ da skulptury, štości zrabiŭ, nam zahadvajuć sačyć za skulpturaj, tamu my taho čałavieka zatrymali.

Pavialičyć

Sam śviedka dziejańni Kasinierava acaniŭ niehatyŭna.

«A čamu nielha nakidvać na skulpturu viaroŭku?» — spytaŭ advakat Hašynski.

«Niepryhoža heta — skulptura ź viaroŭkaj», — padumaŭšy adkazaŭ Bułhak.

Alena Šamkałovič, nastupnaja śviedka, «jechała dadomu na mašynie i zaŭvažyła čałavieka ŭ mascy ź viaroŭkaj u ruce». Žančyna raspaviała, što bačyła kasinieraŭski «pierformans» i zatrymańnie Viačasłava milicyjaj.

Sama jana acaniła ŭčynak Kasinierava «jak chulihanstva».

Advakat Hašynski pasprabavaŭ pacikavicca, ci niama ŭ žančyny svajakoŭ u milicyi, ale ž sudździa źniaŭ pytańnie.

«A daŭno vy tuju skulpturu zaŭvažyli?» — spytaŭ tady advakat.

«Nu, jak minimum za paŭhoda da padziej», — adkazała Šamkałovič.

Nasamreč, skulpturu pastavili tolki 2 sakavika, za 10 dzion da «pierformansa».

Uvohule, Kasinieraŭ z pakazańniami śviedkaŭ nie spračaŭsia, za vyklučeńniem adnaho momantu. Usie śviedki śćviardžali, što niezdalok ad Viačasłava była niejkaja dziaŭčyna. Jon ža zapeŭnivaŭ, što byŭ adzin.

Vysłuchali taksama i Siarhieja Biaspałava, načalnika sałdataŭ- achoŭnikaŭ, što zatrymali Viačasłava. Taksama daŭ pakazańni padpałkoŭnik milicyi z Maskoŭskaha RAUSa, kudy pryvieźli Kasinierava paśla akcyi.

Dała pakazańni i Maryja Vasiljeŭna, maci Viačasłava. Jana skazała, što nie bačyć va ŭčynku syna čahości nadzvyčaj drennaha.

«U Minsku jość skulptury kaniej, na ich ludzi ŭvohule załaziać», - skazała jana.

«Vy što, nie bačycie roźnicy pamiž kaniom i skulpturaj u formie čałavieka?» — aburyŭ prakuror.

Maryna Nasienka, dziaŭčyna — a dakładniej užo niaviesta — Viačasłava Kasinierava davać pakazańni admoviłasia.

• 0
• 0
• 0
• 0
• 0
• 0
• 0
• 0