Viartańnie Michaleviča nie adbyłosia

Źjezd Partyi BNF vyjšaŭ nie takim užo haračym, jak mnohija dumali, a niekatoryja chacieli. Alesiu Michaleviču nie chapiła šaści hałasoŭ, kab viarnucca na pasadu namieśnika staršyni.

Toje, što najbolšaj intryhaj žnivieńskaha źjezdu partyi BNF budzie «pytańnie Michaleviča», sumnievaŭ nie było. Usio ž vyłučeńnie čatyroch kandydataŭ ad arhanizacyi na parlamenckija vybary vyhladała spravaj dosyć rucinnaj i niecikavaj.

Padtrymku Alesiu Michaleviču (darečy, jon krychu źmianiŭ svoj imidž — pahaliŭsia), jakoha vyklučyli z partyi 14 červienia za interviju «Salidarnaści», vykazali absalutna ŭsie abłasnyja arhanizacyi BNF. Tamu šancy na ŭznaŭleńni pasadzie taksama vyrastali. Ale lohkaj baraćby nichto nie čakaŭ.

I žarści nasamreč zakipieli ci nie adrazu paśla charavoha vykanańnia himnu «Mahutny Boža». Vyśvietliłasia, što delehatami źjezdu nie byli pryznanyja pradstaŭniki Viciebskaj i Homielskaj abłaściej. Na ichnych schodach nie było kvorumu. Barščeŭski nie pajšoŭ na sastupki, skazaŭšy, što za kožnym krokam partyi naziraje Ministerstva justycyi».

Staršynia BNF Lavon Barščeŭski vystupiŭ z 20-chvilinnaj spravazdačaj. U pryvatnaści, lider partyi zaklikaŭ da abjektyŭnaha raśśledavańnia vybuchu 4 lipienia, a taksama spynieńnia ŭcisku na siabroŭ partyi. U vypadku niespynieńnia represij BNF moža pakinuć za saboj prava źniacca z parlamenckaj kampanii.

Videa Jarasłava Ściešyka

Nazyvalisia kankretnyja vypadki, kali z pracy zvolnili kobrynca Alaksandra Miecha i Leanida Aŭtuchova z Haradku, pryzyŭ u vojska Vitala Karatyša z Kažan‑Haradku, admova ŭ rehistracyi inicyjatyŭnaj hrupy Źmitra Vinahradava ź Miadzieła. Barščeŭski pryznaŭsia, što napiaredadni mieŭ telefonnuju razmovu z Paŭłam Jakuboviča, jaki abiacaŭ razabracca ŭ sytuacyi ź Miecham.

Staršynia BNF skazaŭ, što partyi važna vyłučyć svajho kandydata na prezydenckija vybary ŭpieršyniu ad 1994 hodu. Razam z tym, jon adznačyŭ, što ŭ lubym vypadku, niezaležna ad rašeńnia ADS, na vybary źbirajucca iści Alaksandar Milinkievič, Siarhiej Kalakin i Mikoła Statkievič. Kožny z hetych kandydataŭ pasprabuje adarvać u svajoj kamandy častku siabroŭ BNF. Barščeŭski pryznaŭsia, što mieŭ pieramovy z Andrejem Sańnikavym nakont prezydenckaj kampanii. Na prapanovu ŭstupić u BNF kaardynatar «Chartyi‑97» tak i nia daŭ adkazu.

Namieśnik staršyni BNF Juraś Hubarevič paličyŭ, što kandydat u prezydenty ad BNF nie nadaść partyi asablivaha ŭpłyvu i rejtynhu. Jon nazvaŭ tych ludziej, što zajavili ŭnutry arhanizacyi ab ustupleńni ŭ prezydenckuju kampaniju «klubam palityčnych pensijaneraŭ».

Hubarevič pryvioŭ prykład, što ŭ 2006 siabry BNF zmahli sabrać za Milinkieviča tolki 50‑60 tysiač podpisaŭ, što nie dastatkova, kab zajaŭlać pra ŭłasnuju paŭnavartasnuju kampaniju. Hubarevič zaklikaje nie hublać toj patencyjał, što byŭ napracavany ciaham minułych hadoŭ. Ni dla koha nie sakret, što tut mieŭsia na ŭvazie Alaksandar Milinkievič, jaki bolš viadomy ŭ hramadztvie.

Nakont viadomaści Barščeŭski zrabiŭ nievialikuju remarku, što ŭ biełaruskaj encyklapedyi jość 40 artykułaŭ pra siabroŭ BNF, ale niama pra Milinkieviča.

Nu a ŭžo potym pačalisia debaty pa Michaleviču. Sam palityk paćvierdziŭ, što paprasiŭ prabačeńni ŭ abražanych im asob u hazecie «Naviny BNF». A svajo vyklučeńnie Michalevič źviazaŭ z svaimi ž prezydenckimi ambicyjami.

Pytańnie pra adnaŭleńnia Alesia na pasadzie namieśnika staršyni było vyrašana pastavić na patajemnaje hałasavańnie. A pierad hetym Lavon Barščeŭski skazaŭ, što budzie rasceńvać hetaje hałasavańnie jak davier da partyjnaha kiraŭnictva.

Vynik: suprać — 33 delehaty, za — 28, ustrymalisia — 2. Nie chapiła akurat tych samych šaści viciebskich i homielskich hałasoŭ. Jak i na minułym źjeździe, hałasy padzialilisia amal papałam.

Lavon Barščeŭski i Viktar Ivaškievič prapanoŭvali adnavić Michaleviča jak šarahovaha siabra partyi. Adnak navat takaja kampramisnaja prapanova sustreła vialiki pratest najstarejšych siabroŭ BNF — Hołubieva, Chadyki, Sadoŭskaha. Hołubieŭ navat paabiacaŭ vyjści z partyi ŭ vypadku adnaŭleńnia.

Zrešty, Michalevič sam admoviŭsia ad padobnaha hałasavańnia. Na siońniašni momant znoŭ pryniać palityka ŭ partyju moža lubaja rajonnaja struktura. Sam Michalevič pakul nia vyznačyŭsia, ci zrobić tak.

• 0
• 0
• 0
• 0
• 0
• 0
• 0
• 0