Zbornaja Biełarusi zavajavała siarebrany miedal u kamandnym mnahaborji na čempijanacie Jeŭropy pa mastackaj himnastycy, jaki prachodzić u Budapiešcie, paviedamlaje BiełTA.
Na kantynientalnym forumie ŭpieršyniu pieramožcy i pryziory ŭ hetym vidzie prahramy vyznačalisia pa sumie bałaŭ vystupu himnastak ŭ kvalifikacyi asobnych vidaŭ i junijorskaj zbornaj u hrupavych praktykavańniach.
Alina Harnośka i Kaciaryna Hałkina paśpiachova vystupili ŭ indyvidualnych spabornictvach. U kamandzie Biełaruś pradstavili junijorki Vieranika Bialajeva, Anastasija Makucevič, Alina Truškina, Dyjana Misiučenka, Łalita Mackievič i Ksienija Jaromienka. U sumie spartsmienki nabrali 171,450 bała.
Apiaredzili biełarusak tolki rasijanki (182,175 bała), jakich u kamandnym mnahaborji pradstaŭlali takija viadomyja himnastki, jak Alaksandra Sałdatava, Dzina i Aryna Avieryny.
Bronzavymi pryziorami stali himnastki z Bałharyi - 170,300 bała. Na čempijanacie Jeŭropy ŭ Budapiešcie siońnia adbuducca finały ŭ asobnych vidach, u jakich vystupiać Kaciaryna Hałkina i Alina Harnośka.
Taksama buduć razyhranyja miedali ŭ kamandnych vystupach. Hałoŭnym ža startam dla biełaruskich hracyj stanie čempijanat śvietu, jaki ad 30 žniŭnia da 3 vieraśnia prymie italjanski Piezara.
Ciapier čytajuć
Vučniaŭ, jakija z matam parvali ekzamienacyjnyja bilety pa historyi Biełarusi, prymusili vybačacca kala manumienta Pieramohi42
Kamientary