«My nie možam ihnaravać prablemy». Vilnia adkazała na vyklik pasła ŭ MZS Biełarusi
Litva šanuje ekanamičnaje partniorstva ź Biełaruśsiu, adnak «nie moža ihnaravać prablemy, jakija isnujuć u hetaj krainie», zajaviŭ litoŭski ministr zamiežnych spraŭ Linas Linkiavičus. Pra heta paviedamlaje delfi.lt sa spasyłkaj na BNS. Tak jon adreahavaŭ na vyklik pasła Litvy Andrusa Pułokasa ŭ MZS RB dla tłumačeńniaŭ z nahody vykazvańniaŭ prezidenta Litvy.
— My zaŭsiody pamiatajem pra toje, što heta naš susied, što my z hetym susiedam i handlujem, i supracoŭničajem, i partniorstva ŭ hetym sensie vielmi važnaje. Adnak jość aśpiekty, jakija zasłuhoŭvajuć kamientaroŭ. My nie možam nie źviartać uvahi na heta. Nakolki mnie viadoma, prezident vykazała svoj pohlad z nahody arhanizavanych Rasijaj u apošni čas vučeńniaŭ, u jakija Biełaruś vielmi intehravanaja, jaje terytoryja vykarystoŭvajecca dla dysłakacyi vialikich mahutnaściaŭ, — zajaviŭ u sieradu ranicaj Linkiavičus, dadaŭšy, što ŭ Minsku nie žadajuć abmiarkoŭvać BiełAES.
Nahadajem, 5 červienia prezident Litvy Dala Hrybaŭskajcie nazvała «vyklikam i pahrozaj» susiedstva z Rasijaj i Biełaruśsiu.
— Estonija, jak i Łatvija, a taksama Polšča dla nas vielmi važnyja, bo heta uschodniaja miaža NATA, tamu vykliki i pahrozy — tyja ž. Heta - znachodžańnie Rasii i Biełarusi la našych uschodnich miežaŭ. Viadoma, heta i militaryzacyja, jakuju my nazirajem u Kalininhradzie, vykarystańnie terytoryi Biełarusi dla roznych ekśpierymientaŭ i ahresiŭnych hulniaŭ, nakiravanych suprać Zachadu. Siarod ich — i majučyja adbycca vajskovyja vučeńni [»Zachad-2017»], — adznačyła Hrybaŭskajcie.
Uviečary ŭ MZS Biełarusi vyklikali litoŭskaha pasła Andrusa Pułokasa i zapatrabavali tłumačeńniaŭ u suviazi z zajavami Hrybaŭskajcie.
— Vykarystanaja prezidentam Litvy leksika, uklučajučy słovy «ahresiŭnyja hulni», źjaŭlajecca abrazaj dla našaj krainy, jakaja viadzie miralubivuju palityku, jakaja ŭnosić realny i ahulnapryznany ŭniosak u spravu ŭmacavańnia biaśpieki našaha rehijonu», — adznačyli ŭ MZS.
Tam dadali, što takija zajavy robiacca nie dla ŭmacavańnia biaśpieki ŭ rehijonie, a kab pavysić svaju paznavalnaść siarod partnioraŭ pa NATA i papularnaść u vybarščykaŭ.
Ciapier čytajuć
«My nie viedali Siarhieja Cichanoŭskaha da siońniašniaj pres-kanfierencyi»14
Kamientary