Tok-šou na TVC: «U Rasii mnohija zabyvajucca, što Biełaruś była, jość i, napeŭna, budzie niezaležnaj dziaržavaj»
Na rasijskim telekanale TVC 20 červienia vyjšła pieradača «Prava hołasu». Užo nie ŭ pieršy raz jana była pryśviečanaja Biełarusi. Z našaj krainy ŭ Maskvu pryjechaŭ zvykły desant: prarasijskija ekśpierty Alaksiej Dzierman i Piotra Piatroŭski, namieśnik staršyni ŁDP Aleh Hajdukievič, a taksama ekanamist Hieorhij Hryc.
Ci mianiaje Biełaruś kurs, pytalisia ŭ haściej. Farmalnaj pryčynaj stałasia toje, što Nacbank Biełarusi vyklučyŭ rasijski rubiel sa śpisu reziervovych valut.
Člen Savieta Fiederacyi Rasii Siarhiej Kałašnikaŭ raskazaŭ: «My praktyčna kožny hod dajem Biełarusi vialikija tranšy na ŭviadzieńnie adzinaj valuty, jakija paśpiachova pieravarvajucca»
«A dzie adzinaja valuta?» — staŭ kryčać viadučy pieradačy Raman Babajan.
«Užo ŭ 2000-m hodzie było zrazumieła, što nijakaj adzinaj valuty nie budzie», — zapeŭniŭ Kałašnikaŭ, jaki ŭ toj čas źjaŭlaŭsia ministram pracy Rasii.
«Nijakich tranšaŭ na stvareńnie adzinaj valuty nie było. Miakka kažučy, heta niapraŭda», — paryravaŭ Hieorhij Hryc.
Paśla hetaha havorka zajšła pra biełaruskuju AES, jakuju budujuć pobač z Astraŭcom. Litoŭcy paličyli, što stancyja pahražaje biaśpiecy ich krainy.
«Zajzdrościać, niama hrošaj, i Jeŭrasajuz nie dazvoliŭ», — rastłumačyŭ Hajdukievič, čamu Litva nie stała budavać svaju AES na miažy ź Biełaruśsiu.
Biełarus z Vyšejšaj škoły ekanomiki Dźmitryj Bałkuniec adznačyŭ, što Biełaruś zaŭsiody svoječasova płaciła pa tranšach MVF, «u adroźnieńnie ad paŭdniovych susiedziaŭ».
«My viedajem, što heta za susiedzi. Nie vymaŭlajcie ich usłych, nie treba», — viadučy Babajan tak adreahavaŭ na zhadku Ukrainy. Hości sustreli hety «žart» rohatam. Pryčym i biełaruskija hości.
«Jak Ukraina, jakaja pradała ziamlu, kab atrymać kredyt MVF, tak Biełaruś nie zrobić nikoli», — pierakonvaŭ rasijskich hledačoŭ Hajdukievič.
«Ja ž prasiŭ usłych nie vymaŭlać», — znoŭ adžartavaŭsia Babajan.
Deputat Kałašnikaŭ jak niedružalubnyja pavodziny Biełarusi pryvodziŭ toj fakt, što naša kraina pastaviła ŭ Rasiju «bolš małaka, čym sama vyrabiła». Toje ž z samaje, maŭlaŭ, adbyvajecca ź jabłykami.
«My ŭ Rasii zabyvajemsia, što Biełaruś była, jość i, napeŭna, budzie absalutna suvierennaj dziaržavaj. Heta absalutna pravilny prahmatyzm Biełarusi. A Rasija pniecca abjadnać toje, što z Rasijaj abjadnoŭvacca nie budzie. U Biełarusi nikoli nie budzie stajać pytańnie navat ab drabniejšaj stracie suviereniteta», — skazaŭ Siarhiej Kałašnikaŭ.
Viadučy Babajan raskazvaŭ publicy pra strašnych biełaruskich nacyjanalistaŭ, jakija ŭ internecie nazyvajuć siabie naščadkami VKŁ i nie chočuć mieć ničoha ahulnaha z Rasijaj. Pa jaho słovach, z takimi «lićvinami» viadzie zmahańnie Alaksiej Dzierman.
Naprykancy pieradačy słova ŭziaŭ Bahdan Biaspalka, historyk, adzin z samych adyjoznych biełarusafobaŭ u Rasii.
«Źmiena kursa adbyvajecca. Biełaruś aściarožna mianiaje kurs. Nichto nie choča rvać prosta ciapier», — ličyć Biazpalka. Jon zhadaŭ, što za kratami praciahvajuć znachodzicca try prarasijskija publicysty: Paŭłaviec, Alimkin i Šyptenka.
«Heta hramadzianie Biełarusi, my raźbiaromsia ź imi sami», — zakryčaŭ Hajdukievič.
Biazpalku heta nie spyniała, maŭlaŭ, najlepšyja ludzi krainy siadziać u turmie, a voś Źmicier Daškievič na voli. Maŭlaŭ, nieparadak adbyvajecca.
Dźmitryj Bałkuniec zhadaŭ, što pa «całkam sfabrykavanaj spravie» ŭ źniavoleńni taksama znachodziacca byłyja aktyvisty «Biełaha lehijona».
Na heta Alaksiej Dzierman adreahavaŭ, što «KDB razhramiŭ nacyjanalistyčnaje padpolle».
Naprykancy pieradačy u biełaruskich udzielnikaŭ chacieli spytać, dyk čyj usio ž Krym, ale čamuści pieradumali heta rabić.
Kamientary