Viarchoŭny sud Indyi pastanaviŭ skasavać praktyku tak zvanaha «imhniennaha razvodu» musulman, bo taja supiarečyć kanstytucyi, piša VVS.
Praktyka, za admienu jakoj vystupali aktyvisty pa abaronie praŭ žančyn, nazvanaja supiarečlivaj isłamu.
Indyja — adna ź niamnohich krain śvietu, dzie musulmanin moža raźvieścisia z žonkaj na praciahu niekalkich chvilin, pramoviŭšy słova «tałak» (razvod na arabskaj movie) try razy. U mnohich musulmanskich krainach takaja praktyka zabaronienaja.
Rašeńnie suda było pryniataje ŭ adkaz na pazovy, jakija asprečvali hety zvyčaj. Pazovy byli padadzienyja piaćciu žančynami-musulmankami, jakija majuć dośvied takoha razvodu, i pradstaŭnikami dźviuch pravaabarončych hrup.
«Žančyny-musulmanki ŭ Indyi pakutujuć na praciahu apošnich 70 hadoŭ. Heta histaryčny dzień dla nas, ale nie zakančeńnie našaj historyi. Nie mahu pieradać vam, jak šmat indyjskich žančyn padtrymlivała nas», — padzialiłasia z žurnalistami adna z aktyvistak Zakija Soman.
Za apošnija hady ŭ Indyi było šmat vypadkaŭ trajnoha tałaka, kali mužy abviaščali svaim žonkam ab razvodzie trojčy. Pry hetym nieabaviazkova heta rabić asabista — dastatkova było tolki lista, sms-paviedamleńnia abo telefanavańnia.
Niahledziačy na toje, što pra trajny tałak niama zhadak u Karanie i sunie praroka Muchamieda, hetaja praktyka isnuje davoli daŭno.
Daśledčyki isłamu kažuć, što ŭ Karanie ŭtymlivajecca dakładnaje tłumačeńnie pracedury razvodu — «O, Prarok! Kali vy dajacie žonkam razvod, to razvodźciesia na praciahu ŭstanoŭlenaha terminu, viadzicie adlik hetaha terminu i bojciesia Ałacha, vašaha Hospada».
Pavodle danych pravaabaroncaŭ, u niekatorych isłamskich dziaržavach, naprykład, u Pakistanie i Banhładeš, zabaranili trajny tałak, ale ŭ Indyi hetaja praktyka isnuje na fonie adsutnaści ŭniviersalnaha zakanadaŭstva ab siamji i šlubie, jakoje prymianiajecca da kožnaha hramadzianina krainy.
U rašeńni suda praktyka trajnoha tałaka nazvanaja «supiarečnivaj hałoŭnym pryncypam isłamu i artykułu 14 kanstytucyi krainy, jakaja harantuje raŭnapraŭje».
Ciapier čytajuć
Jakaja łohika sudoŭ za Hajun? Mužčyna, jakoha zatrymlivali pa hetaj spravie, apisaŭ ubačanaje6
Kamientary