Minskija biehuny praviaduć 24-hadzinnuju estafietu-marafon

U Minsku 1—2 vieraśnia projdzie 24-hadzinny marafon u farmacie estafiety. Udzielniki biehavoha prajekta YOUCAN razam z usimi achvotnymi cełyja sutki buduć biehać u centry horada. Tak, jany prymuć «Vyklik 100 000: velcombegom» i dapamohuć biełarusam sumarna prabiehčy 100 tys. km, jakija velcom pieraviadzie ŭ 100 tys. rubloŭ u dapamohu dzieciam ź ciažkimi zachvorvańniami.

Marafon startuje ŭ 16.00 u centry Minska (steła «Alimpijski čas» kala Pałaca sportu na praśpiekcie Pieramožcaŭ) i zavieršycca tam ža roŭna praz sutki. Kožnuju hadzinu biehuny płanujuć pa čarzie źmianiać adzin adnaho, ale pry hetym chtości sa spartsmienaŭ zaŭsiody budzie znachodzicca ŭ ruchu. Kožny žadajučy zmoža dałučycca da kałony biehunoŭ, kali ŭ hety čas taksama vyjšaŭ na prabiežku. Daŭžynia maršrutu składzie 5 kiłamietraŭ.

Sačyć za pieramiaščeńniem udzielnikaŭ 24-hadzinnaha marafonu možna budzie ŭ sacyjalnych sietkach. «Dla Minska 24-hadzinny marafon stanie pieršym takim dośviedam. Tym samym my dapamožam usim, chto pryniaŭ «Vyklik 100 000: velcombegom» i ciapier imkniecca dasiahnuć adznaki ŭ 100 tys. km. Akramia taho, my jašče raz pakažam, što biehać — heta nie tolki karysna, ale i možna rabić heta z sensam », — rastłumačyŭ kiraŭnik biehavoha prajekta YOUCAN Pavieł Kazačonak.

Marafoncy buduć biehać sa smartfonami i fitnes-trekierami, kab fiksavać svaje vyniki. Usie zavajavanyja kiłamietry pojduć u ahulnuju «skarbonku» sacyjalnaj kampanii «Vyklik 100 000: velcombegom».

Jaje ŭmovy takija: kali da 4 vieraśnia biełarusy razam pieraadolejuć 100 tys. km, velcom pieraličyć 100 tys. rubloŭ na rachunak Respublikanskaj dziciačaj balnicy miedycynskaj reabilitacyi, u jakoj papraŭlajuć zdaroŭje dzieci ź ciažkimi zachvorvańniami. Kab unieści pasilny ŭkład, treba ŭziać na prabiežku smartfon i zafiksavać adlehłaść z dapamohaj luboha fitnies-dadatka.

Vyniki zabiehu ŭ vyhladzie skrynšota z ukazańniem daty i kiłamietražu nieabchodna vykłaści ŭ sacsietki z chešteham #velcombegom abo #viełkombiehom. Biehać možna va ŭsim śviecie i ŭ luby čas sutak.

«Vyklik za 100 000: velcombegom» pravodzić velcom pry padtrymcy Ministerstva achovy zdaroŭja. Sacyjalnaja inicyjatyva zaklikanaja dapamahčy dzieciam i pavysić cikavaść da biehu i zdarovaha ładu žyćcia siarod nasielnictva. Respublikanskaja dziciačaja balnica miedycynskaj reabilitacyi, jakoj nakirujuć sabranyja srodki, — adziny ŭ krainie centr, dzie prachodziać azdaraŭleńnie dzieci z hiemafilijaj, ankałohijaj i chvarobami nyrak.

• 0
• 0
• 0
• 0
• 0
• 0
• 0
• 0