Kali ŭsio pryjełasia, to hrušava-mindalnyja kieksy vas pryjemna ździviać
Jula — nie viadomy šef-povar i nie modny fudbłohier. Jula — naša veb-redaktarka, jakaja vielmi lubić hatavać, a jašče bolš — piačy. Na redakcyjnych płaniorkach my nie raz častavalisia jaje pirahami dy mafinami i viedajem, što joj jość čym padzialicca.
Jašče adnosna niadaŭna vypiečka najpraściejšaha kieksa była dla mianie sapraŭdnym vyklikam. Ale pastupova, dziakujučy praktycy i niepieraadolnaj lubovi da smačnaj ježy, usio źmianiłasia. Ja addaju pieravahu receptam, jakija nie patrabujuć zališnich vysiłkaŭ i doŭhich «tancaŭ z bubnam» la plity. Tamu ŭpeŭnienaja: atrymałasia ŭ mianie — atrymajecca i ŭ vas.
Ja lublu siezonnaść u vypiečcy, tamu pačać našy kulinarnyja pryhody prapanuju z hrušava-mindalnych kieksaŭ. Mindalnaja muka kamuści moža padacca zanadta darahim i ekzatyčnym inhredyjentam. Ale ŭjavicie sabie majo ździŭleńnie, kali, hartajučy «Litoŭskuju kucharku» Vincenty Zavadskaj, ja pabačyła, što dla našych prodkaŭ hetaja muka była davoli zvykłym składnikam piečyva i desiertaŭ. Da taho ž, jaje nie škadavali: «vaźmicie 12 žaŭtkoŭ, šklanku drobna pasiečanaha mindalu»…
U našym recepcie mindalnaj muki zusim niašmat. Možna kupić mindal i samastojna zdrabnić jaho ŭ blendary — vyjdzie tańniej. A možna ŭvohule zamianić toj ža kolkaściu celnaziernievaj muki, a dla vodaru i smaku dadać ulubionyja prypravy — cynamon, kardamon… Ale raju ŭsio ž pasprabavać mindal, jon nadaje kieksam niezvyčajnuju teksturu i lohkaść.
Hrušava-mindalnyja kieksy
Vam spatrebicca:
- 100 h pšaničnaj muki
- 100 h celnaziernievaj muki
- 50 h mindalnaj muki
- 2 č. ł. razrychlalniku
- 90 h cukru
- 90 h masła
- 1 jajka
- 175 mł małaka
- 2 vialikija hrušy
Jak rabić:
1. Hrušy pačyścić i narezać nievialikimi kubikami.
2. Źmiašać try vidy muki z razrychlalnikam i cukram. Dadać pakrojenaje kubikami masła i raścierci ŭsio ŭ krošku.
3. Jajka źlohku ŭźbić videlcam, źmiašać z małakom. Vylić u sumieś masła i muki, raźmiašać da adnarodnaści (ale ni ŭ jakim razie mocna nie vymiešvać).
4. Dadać parezanyja hrušy i znoŭ aściarožna raźmiašać.
5. Zapoŭnić ciestam formački prykładna na 3/4. Źvierchu možna pasypać mindalnymi pialostkami ci rublenym mindalem z cukram. Ja ž zrabiła štrejziel: źmiašała ŭ krošku prykładna pa 30 h mindalnaj muki, cukru i masła.
6. Piačy 20-25 chvilin pry 200ᵒS.
Ciapier čytajuć
Kvadrat u Minsku kaštuje rekordna doraha: narešcie pabity rekord 2007 hoda2
Kamientary