Kampanija Tesla była vymušanaja adklikać 11 tysiač aŭtamabilaŭ madeli Ch, paviedamlaje Business Insider, spasyłajučysia na paviedamleńnie kampanii. Akazałasia, što ŭ madeli vyjavilisia prablemy z zadnimi siadzieńniami, jakija mohuć paŭpłyvać na biaśpieku pasažyraŭ. Niahledziačy na toje, što tolki ŭ 3% krasovieraŭ majecca takaja prablema, vytvorcy pryniali rašeńnie adklikać aŭtamabili dla dyjahnostyki i praduchileńnia niaspraŭnaściaŭ.
Niaspraŭnaść vyjaviłasia vypadkova. U chodzie čarhovaha płanavaha testavańnia aŭtamabila Tesla X vyśvietliłasia, što kabieli ad elektrapryvadaŭ siadzieńniaŭ druhoha šerahu drenna zamacavanyja i nie adrehulavanyja, tamu padčas sutyknieńnia zadniaje siadzieńnie ź levaha boku moža skłaścisia napierad i ŭdaryć śpinkaj pa siadzieńni kiroŭcy.
Skarhaŭ na hetuju prablemu ŭ Tesla nie atrymlivali, ale ŭsio ž vyrašyli samastojna razabracca ź niedachopam, nie čakajučy sudovych pazovaŭ ad uładalnikaŭ.
U zajavie, apublikavanaj Tesla, skazana, što tym, chto ŭžo paśpieŭ nabyć defiektny elektrakar, dla likvidacyi prablemy dastatkova źviarnucca ŭ servisny centr abo vyklikać śpiecyjalista dadomu — rehuloŭka kabielaŭ zojmie ŭsiaho dziesiać chvilin i budzie zroblenaja za košt kampanii-vytvorcy. Da taho času, pakul kresły nie adrehulavanyja, Tesla raić nie sadzić pasažyraŭ na prablemnyja miescy.
Kamientary