«Klučavoje praviła — nie hierojstvavać». Biełaruska maržuje na polskaj Bałtycy, kab spravicca z depresijaj
U Bałtyjskaje mora Maryja zachodzić spakojnym krokam. Kali vada dasiahaje hrudziej, jana robić udych i zanurajecca. Polskaja Bałtyka i letam mnohim zdajecca zanadta chałodnaj i kapryznaj, ale dziaŭčynu jana nie pałochaje navat zimoj. Bolš za toje, biełaruska zapeŭnivaje: mienavita maržavańnie dapamahaje joj davać rady SDUH, depresijaj i inšymi prablemami sa zdaroŭjem. Pra svajo zachapleńnie jana raskazała Most.
«Nikoli nie adčuvała siabie nastolki doma, jak tut»
Maryja apynułasia ŭ Polščy nie pa svajoj voli. Na ekstranny adjezd jana navažyłasia paśla vyklikaŭ u KDB: siłaviki zacikavilisia joj z-za jaje aktyŭnaj vałanciorskaj dziejnaści ŭ Baranavičach.
Niekalki miesiacaŭ Maryja praviała ŭ łahiery dla ŭciekačoŭ, a potym apynułasia ŭ Sopacie. Pryznajecca, što žyć kala mora było jaje daŭniaj maraj, ale jana nikoli nie dumała, što heta budzie chałodnaja Bałtyka.
Ciapier dziaŭčyna kaža, što navat u rodnym horadzie ŭ jaje nie było takoha adčuvańnia spakoju, jakoje doryć šum pryboju.
«Ja nikoli nie adčuvała siabie nastolki doma, jak tut», — pryznajecca Maryja.
Maryi aficyjna pastavili dyjahnaz SDUH — sindrom deficytu ŭvahi i hipieraktyŭnaści. Taksama jana zmahajecca z nastupstvami kliničnaj depresii.
Vyvučajučy infarmacyju pra svoj stan, jana znajšła daśledavańnie, jakoje pakazała, što znachodžańnie ŭ chałodnaj vadzie na 200% pavyšaje ŭzrovień dafaminu — harmonu, jaki ŭdzielničaje ŭ mnohich pracesach u arhaniźmie, u tym liku jaki ŭpłyvaje na pamiać, kancentracyju ŭvahi, nastroj.
Kali ŭzrovień emocyj «nižejšy za plintus», ledzianaja vada daje vostryja adčuvańni, jakija viartajuć adčuvańnie žyćcia, zapeŭnivaje Maryja.
Dziaŭčyna kaža, što rehularnaja zahartoŭka dapamahła spravicca i ź inšymi prablemami. Naprykład, z reaktyŭnym artrytam, jaki ŭźnik paśla pieraniesienaj ciažkaj pnieŭmanii, — kaleni mocna apuchali i baleli. Ciapier Maryja całkam pazbaviłasia ad bolu. Źnikli i chraničnyja prablemy z łokcievym sustavam — tak zvanaja ruka tenisista, — jakija raniej turbavali pa načach. Biełaruska kaža, što ŭ apošnija dva hady praktyčna pierastała chvareć na prastudnyja zachvorvańni.
Piać chvilin na dośvitku
Maryja addaje pieravahu indyvidualnym akunańniam, paźbiahajučy vialikich hrup. Jaje idealny čas — śvitanak, kali na plažy biaźludna i možna zastacca adzin na adzin z pryrodaj. Samo zanureńnie doŭžycca ŭ siarednim 5 chvilin.
Maryja zachodzić u vadu spakojnym krokam, a kali vada dasiahaje hrudziej, to robić udych i zanurajecca. Jana źviartaje ŭvahu: znachodzicca ŭ vadzie daŭžej za 7‑10 chvilin nie varta — heta moža vyklikać mocny hałaŭny bol.
U jaje «nabory marža» — usio nieabchodnaje dla biaśpiečnaha i kamfortnaha apuskańnia ŭ chałodnuju vadu. U pieršuju čarhu heta nieaprenavyja škarpetki i palčatki: mienavita kiści i stupni zamiarzajuć chutčej za ŭsio, pakolki ŭ ich amal adsutničaje tłuščavaja prasłojka.
Abaviazkovyja elemienty ekipiroŭki — šapka abo paviazka. Hałavu nie rekamiendujecca mačyć, kab źnizić ryzyku sasudzistych spazmaŭ.
Akramia taho, Maryja vykarystoŭvaje ryštunak dla chutkaha pieraapranańnia: ručnik-ponča, kilimok pad nohi i ciopły kambiniezon, jaki možna nadzieć litaralna adnym rucham adrazu paśla vychadu z vady.
«Klučavoje praviła — prysłuchoŭvacca da ŭłasnych adčuvańniaŭ i nie sprabavać hierojstvavać», — tłumačyć jana.
Pačać letam, admovicca ad ałkaholu
Tym, chto tolki zadumvajecca pra chałodnyja kupańni, jana raić pačynać jašče letam i nie spyniać płavać z prychodam vosieni — tak arhanizm paśpiavaje pastupova adaptavacca da źnižeńnia tempieratury vady.
Dla pieršych zapłyvaŭ jana raić vybirać zacišnaje nadvorje, kab vychad z vady nie staŭ dadatkovym stresam dla arhanizma.
Asobnuju ŭvahu varta nadać abaronie hałavy: pačatkoŭcam nie rekamiendujecca zanuracca z hałavoj u ledzianuju vadu.
Ad ałkaholu pierad akunańniem Maryja rekamienduje admovicca całkam: śpirtnoje moža spravakavać sasudzisty spazm i pavysić ryzyki, tamu kudy biaśpiečniej uziać z saboj termas z haračaj harbataj.
Maržavańnie: što treba viedać pierad tym, jak na heta advažycca
«Pakul nie idu ŭ «Žabku». Ale ciažka rabić nastolki mała». Jak žyviecca mužam ajcišnic u emihracyi
Zorka «Biełsata» Valer Rusielik raskazaŭ, čym ryba ŭ Polščy adroźnivajecca ad biełaruskaj
«Jon padyšoŭ i spytaŭ: «Ty hałodnaja, chočaš jeści?» Biełaruskaja piensijanierka raskazała, jak znajšła ščaście ŭ vymušanaj emihracyi
Ciapier čytajuć
Što viadoma pra zatrymanych radyjoamataraŭ, jakim pahražaje až da rasstrełu12
Kamientary
I dobra jašče, kali choć sinonim adpaviedny biełaruski naŭzamien padbiaruć, a nie pryciahnuć u movu zamiest svajho słova pałanizm ci ŭkrainizm.