U Biełarusi źjaviŭsia jašče adzin uładalnik «Srebnaj knopki» ad YouTube. Takuju ŭznaharodu administracyja servisu uručaje tym, chto zmoh sabrać 100 tysiač padpisčykaŭ, paviedamlaje Tut.by.
Na kanał 39-hadovaha Paŭła z Voršy «The road to the film» padpisalisia ŭžo bolš za 127 tysiač čałaviek. Niekatoryja ź jaho rolikaŭ pahladzieła zvyš miljona hledačoŭ. U čym sakret takoha pośpiechu, videabłohier nie viedaje, pra zarobak kaža mimachodź: «Jość prahlady, jość hrošy».

Rabić roliki mužčyna pačaŭ hod tamu, jašče raniej u jaho źjaviłasia žadańnie — źniać svoj film. Mahčyma, kaža, tak syducca zorki, što hety kanał i stanie jaho darohaj da kinamary.
«Kali paštaljon prynies telehramu z paviedamleńniem ab pasyłcy, ja nie adrazu pavieryŭ, što heta knopka, — dzielicca emocyjami videabłohier i ŭspaminaje, z čaho ŭsio pačynałasia hod tamu. — Pamiataju, napisaŭ kamientar pad klipam adnaho viadomaha rep-vykanaŭcy. Praź niejki čas svoj zapis zachaciełasia padredahavać, potym jašče raz. U vyniku praz dva tydni zamiest zvyčajnaha kamientara ŭ mianie była hatovaja historyja dla filma, jaki ja chaču źniać. Ale spačatku ja staŭ zdymać roliki. Zdymaŭ i nia źviartaŭ ni na kaho ŭvahi, prosta rabiŭ toje, što mnie padabajecca».
«Ja pačaŭ zdymać u 38, kab u 60 nie škadavać, što ŭ 38 nie ŭziaŭ u ruki kamieru i nie staŭ niešta rabić», — pa-fiłasofsku dadaŭ Pavieł.
Zdymać i mantavać da hetaha Pavieł nie ŭmieŭ. Spačatku zapisvaŭ na telefon, paźniej kupiŭ ekšn-kamieru. Ahulnaj idei, jakaja abjadnoŭvała b usie siužety jaho videabłoha, niama. Kaža, zdymaje žyćcio — padarožžy, aŭtaahlady i navat svaje treniroŭki.
«Pieršyja paŭhoda moj kanał byŭ absalutna miortvy. Maksimum nabirałasia padpisčykaŭ 700, — uspaminaje Pavieł. — A potym ludzi raptam stali hladzieć. Pamiataju, jak adnojčy pračnuŭsia, a tam plus sto novych čałaviek. Praz tydzień ich było 5000. Zatym znoŭ usio zahłuchła, potym znoŭ ažyło», — kaža jon.
Zaraz na kanał Paŭła padpisana bolš za 127 tysiač čałaviek. Vosiemdziesiat pracentaŭ ź ich žyvuć na terytoryi Rasii, astatnija — žychary Biełarusi, Ukrainy, Kazachstana, Bałharyi. Ŭzrost asnoŭnaj častki ź ich 25-55 hadoŭ.
Jość videa, jakija pahladzieła ŭžo bolš za miljon čałaviek.
«Rolik pra toje, što narkotyk-nasvaj — chvaroba sučasnaj moładzi, kliknuli ŭžo kala paŭtara miljony razoŭ, — pryvodzić prykład udałaha videa Pavał. — Dobra pahladzieli siužet pra dziadulu-pustelnika, jaki žyvie ŭ harach.
Pavał ličyć, što pra zarobak pakul kazać rana. Usio zaležyć ad prahladaŭ: jość prahlady — jość hrošy. Niama prahladaŭ — niama hrošaj. Ale, pavodle jaho, kali zdymać jakasny kantent, to za košt YouTube možna žyć i bolš ničym nie zajmacca.
Pavał kaža, što pierad tym, jak pačaŭ zdymać, jon jeździŭ pracavać u Rasiju. «U pryncypie, dla Biełarusi ja darmajed», žartuje zorka You Tube.
Da Paŭła srebnuju knopku atrymaŭ žychar Hłuska Alaksiej Rudy, jaki sabraŭ sto tysiač padpisčykaŭ na kanale «Prostyja štuki».
Kamientary