MZS Rasii paviedamiŭ, što 19 śniežnia rasijskija vajskoŭcy z Sumiesnaha centra kantrolu i kaardynacyi spynieńnia ahniu i stabilizacyi linii sudakranańnia bakoŭ (SCKK) pakinuć Danbas. Pryčynaj nazvanyja dziejańni Kijeva.
U zajavie rasiejskaha zamiežnapalityčnaha viedamstva ŭkazana, što choć SCKK i byŭ stvorany pa prośbie Ukrainy dla sadziejničańnia realizacyi Minskich pahadnieńniaŭ, Kijeŭ pastajanna ładziŭ pieraškody rasijskim aficeram pry vykanańni imi słužbovych abaviazkaŭ. Im abmiažoŭvali dostup da linii sudakranańnia, zabaraniali razmaŭlać ź miascovymi žycharami.
«Mieli miesca vypadki niepavažlivaha staŭleńnia ŭkrainskich vajskoŭcaŭ da svaich rasijskich kaleh», — havorycca ŭ zajavie.
Z 1 studzienia nastupnaha hoda Ukraina ŭ parušeńnie pahadnieńnia ab biaźvizavych pajezdkach sa studzienia zapłanavała ŭvieści novy paradak ujezdu i znachodžańnia hramadzian Rasii na svajoj terytoryi, u adpaviednaści ź jakim jany pavinny buduć zahadzia paviedamlać miascovym uładam svaje padrabiaznyja piersanalnyja dadzienyja. «Sproby adrehulavać hetaje pytańnie biez škody dla rasijskaha ŭdziełu ŭ SCKK ukrainski bok praihnaravaŭ», — padkreślili ŭ MZS.
«U takich umovach dalejšaja praca pradstaŭnictva Uzbrojenych sił Rasijskaj Fiederacyi ŭ SCKK stała niemahčymaj. 19 śniežnia 2017 hoda rasijskija aficery, jakija ŭvachodziać u skład Centra, pakinuć terytoryju Ukrainy», — paznačana ŭ zajavie.
U źniešniepalityčnym viedamstvie paviedamili, što prainfarmavali zamiežnych partnioraŭ ab hetym vymušanym kroku, całkam uskłaŭšy adkaznaść za mahčymyja nastupstvy na ŭkrainski bok.
Ranicaj 18 śniežnia štab ATA ŭ Kijevie zajaviŭ, što na 19 śniežnia pradstaŭniki samaabvieščanych Danieckaj i Łuhanskaj narodnych respublik rychtujuć pravakacyi na linii sudakranańnia, dla čaho ściahvajuć tudy ŭ tym liku i ciažkaje ŭzbrajeńnie.
Raniej pra toje, što Maskva maje namier adklikać svaich vajennych naziralnikaŭ, paviedamlała Śpiecyjalnaja manitorynhavaja misija ABSIE va Ukrainie. Hetuju infarmacyju paćvierdziŭ i namieśnik kiraŭnika apieratyŭnaha kamandavańnia DNR Eduard Basuryn. Jon nie zmoh skazać, kali na Danbas prybudzie novaja hrupa naziralnikaŭ z Rasii.
Śpiavačku Meryjem Hierasimienka na praciahu dvuch hadoŭ źbivaŭ muž43
Śpiavačku Meryjem Hierasimienka na praciahu dvuch hadoŭ źbivaŭ muž
Jak Jadźvihin Š. smažyŭ u redakcyi skvarki i čamu łožak Kupały nahadvaŭ dochłaha viarbluda. Ivulin i Astapienia źniali zachaplalny film pra «Našu Nivu»88
Kamientary