Hłobus i Volski zapuścili dziciačy prajekt, pryśviečany Maleviču
Na kraŭdfandynhavaj placoŭcy ulej.by zapuściłasia kampanija «Malevič dla dziaciej», pryśviečanaja mastaku-avanhardystu, jaki voś užo bolš za 100 hadoŭ niepakoić čałaviečyja rozumy, nie pakidajučy nikoha abyjakavym. Kazimir Malevič akazaŭ mocny ŭpłyŭ na biełaruskaje mastactva, stvaryŭšy ŭ Viciebsku abjadnańnie UNOVIS («Utvierditieli novoho iskusstva»).
Prajekt «Malevič dla dziaciej» składajecca z knihi, pieśni i multyplikacyjnaha klipa. Padtrymać prajekt i atrymać ekskluziŭny padarunak — knihu «Malevič dla dziaciej» — možna da 26 studzienia. Źjaŭleńnie vydańnia na palicach knižnych kramaŭ pakul nie zapłanavana.
Aŭtarami prajekta źjaŭlajucca «Dziciačyja tvorčyja majsterni» halerei «Ŭ» sumiesna ź viadomymi piśmieńnikami: Adamam Hłobusam, Andrejem Chadanovičam, Valancinam Akudovičam i muzykam Lavonam Volskim. Apošni dla knihi napisaŭ dźvie dziciačyja pieśni pra tvorčaść Kazimira Maleviča.
«Nam chaciełasia zrabić bolš, čym tolki knihu. Cikava stvarać šmatpłanavyja prajekty, — śćviardžajuć pradstaŭniki «Dziciačych tvorčych majsterniaŭ». — Tamu my pryniali rašeńnie pajści niestandartnym šlacham i pravieści kraŭdfandynhavuju kampaniju, kab sabrać srodki na zapis dziciačaj pieśni i stvareńnie animacyjnaha klipa, a pa sutnaści — multfilma, jaki my razam ź dziećmi i namalujem.
Dziakujučy hetamu prajektu dzieci zmohuć nie tolki vyvučyć tvorčaść mastaka, čytać kazki i vieršy pra jaho, vykonvać tvorčyja zadańni ŭ samoj knizie, ale i hladzieć multfilm, napiavajučy pieśniu pra Maleviča».
Tvorčaść Kazimira Maleviča nie prostaja dla ŭsprymańnia. Ź im nie mahčyma «pasiabravać», aceńvajučy tolki pa tradycyjnym pryncypie «pryhoža — nie pryhoža». Tamu ŭ prajekcie pry dapamozie kazak, vieršaŭ, hulniaŭ i piesień tłumačacca składanyja fiłasofskija idei.
Safija Sadoŭskaja, mastactvaznaŭca prajekta i mama čatyrochhadovaj Jevy:
«Z samaha naradžeńnia my spaznajem śviet. Heta składany šlach, jaki kožny prachodzić pa-svojmu. Ale prastora hetaha paznańnia maje istotnaje značeńnie. Važnaja jaho šyrynia i raznastajnaść. Mienavita heta ŭžo ŭ darosłym uzroście dapamahaje čałavieku znachodzić apiryšča ŭ navakolnym śviecie, supastaŭlać jaho z saboj i budavać masty da razumieńnia składanych kancepcyj sučasnaha mastactva. Dajučy dzieciam razumieńnie raznastajnaści formaŭ mastactva, my farmujem bazavaje pryniaćcie niezrazumiełaha / inšaha. Paśla hetaha dzicia idzie dalej - daśleduje hetaje niezrazumiełaje, zadajecca pytańniami, znachodzić adkazy, a nie spyniajecca na fazie «ja taksama tak mahu». Malevič ździejśniŭ revalucyju ŭ mastactvie i my da hetaha času bačym, jak jaho idei ŭpłyvajuć na našu štodzionnaść, na našu vizualnuju kulturu i jak plonna sučasnyja mastaki pracujuć z vobrazami Maleviča, vybudoŭvajučy svaje ŭłasnyja dyjałohi ź jaho pracami».
Uzor knihi «Malevič dla dziaciej» možna pahladzieć u kniharni «Łohvinaŭ» (h. Minsk, pr-t Niezaležnaści, 37a) i ŭ «Kramie Ŭ» (h. Minsk, vuł. Niamiha 5-40, 2-hi pavierch HC «Mietrapol»), prosta paprasicie jaho ŭ kansultantaŭ.
U kancy minułaha hoda «Dziciačyja tvorčyja majsterni» paśpiachova zaviaršyli kraŭdfandynhavuju kampaniju, pryśviečanuju ich pieršaj knizie — «Mastactva Biełarusi XX stahodździa. Viciebskaja škoła» dla dziaciej.
Ciapier čytajuć
Maładuju biblijatekarku z Horak asudzili za pratesty2
Maładuju biblijatekarku z Horak asudzili za pratesty
Piśmieńnica Taćciana Zamiroŭskaja raskazała pra novuju knihu, sny pra Łukašenku, košt žyćcia ŭ Ńju-Jorku i toje, čamu złuje na niekatorych biełarusaŭ1515
Kamientary