Prezident Łatvii Rajmond Viejonis padpisaŭ zakon ab statusie ŭdzielnika Druhoj suśvietnaj vajny, jaki nie dazvalaje pryznavać vieteranami supracoŭnikaŭ KDB SSSR i KDB Łatvii. Pra heta paviedamlaje partał Delfi.
U śniežni 2017 hoda łatvijski parłamient Siejm u kančatkovym čytańni pryniaŭ zakon ab prysvajeńni statusu vieterana Druhoj suśvietnaj vajny hramadzianam Łatvii, jakija vajavali jak suprać nacysckaj Hiermanii, tak i suprać SSSR. Na nie hramadzian zakon nie raspaŭsiudžvajecca.
Status vieterana pazbaŭlajucca ŭdzielniki Druhoj suśvietnaj vajny, jakija byli supracoŭnikami KDB SSSR i KDB Łatvijskaj Savieckaj Sacyjalistyčnaj Respubliki. Vyklučeńnie budzie zroblena tolki dla supracoŭnikaŭ finansavych i administracyjna-haspadarčych strukturnych padraździaleńniaŭ hetych viedamstvaŭ.
Status udzielnikaŭ vajny taksama nie atrymajuć členy Nacyjanał-sacyjalistyčnaj partyi Hiermanii i jaje vajenizavanych struktur, tajnaj palicyi i słužbaŭ biaśpieki Treciaha rejcha, a taksama asoby, asudžanyja za złačynstvy suprać čałaviectva i anałahičnyja złačynstvy. Akramia taho, u zakonie skazana, što Łatvija nie niasie adkaznaści za «dziejańni akupacyjnych sił» i jak akupavanaja dziaržava nie prymała ŭdzieł u vajennych dziejańniach padčas Druhoj suśvietnaj vajny.
Zakon byŭ prapanavany kamisijaj Siejma pa pravach čałavieka i hramadskich spravach. Metaj zakona jaho aŭtary pastavili pryznańnie i acenku zasłuh hramadzian Łatvii, jakija padčas vajny znachodzilisia ŭ składzie rehularnych vajskovych častak inšych dziaržaŭ i ŭdzielničali ŭ baraćbie suprać uzbrojenych farmavańniaŭ SSSR, nacysckaj Hiermanii ci jaje sajuźnikaŭ.
Azaraŭ mocna pakryŭdziŭsia na słovy «psieŭdalidarki Cichanoŭskaj», što jaho Płan Pieramoha byŭ pamyłkaj32
Kamientary