Kiraŭniki dypmisij Vjalikabrytanii, Rumynii i Izraila ŭ Biełarusi padtrymali paetyčny fłešmob i pračytali viadomyja vieršy biełaruskich kłasikaŭ. Vybar dypłamataŭ upaŭ na tvory Jakuba Kołasa i Pimiena Pančanki, a prezientacyja videarolikaŭ adbyłasia ŭ Dzień rodnaj movy. Raniej da fłešmobu ŭ ramkach prajekta «Čytajem pa-biełarusku z velcom» dałučylisia ich kalehi ź inšych zamiežnych misij i taksama pračytali biełaruskija tvory.
Nadzvyčajny i paŭnamocny Pasoł Rumynii, spadar Vijareł Mašanu, pračytaŭ vierš Jakuba Kołasa «Nadychod zimy», jaki adlustroŭvaje emocyi, ułaścivyja dla hetaj pary hoda.
Nadzvyčajny i Paŭnamocny Pasoł Dziaržavy Izrail Ałan Šoham abraŭ inšy tvor Jakuba Kołasa — «Mnoha słaŭnieńkich kutočkaŭ …». Dypłamat taksama pieravioŭ paetyčnyja radki na rodnuju movu. Tak vieršy biełaruskaha kłasika prahučali i na iŭrycie.
Spadarynia Fijona Hib, kiraŭnik pasolstva Złučanaha Karaleŭstva Vialikabrytanii i Paŭnočnaj Irłandyi, pračytała vierš Pimiena Pančanki «Mała skazać: nienavidžu …».
Na pačatku zimy vieršy biełaruskich aŭtaraŭ užo pračytali pradstaŭniki dypmisij Šviecyi, Słavakii, Čechii, Finlandyi, Kyrhyzstana, Italii, ZŠA, Respubliki Kareja i Ukrainy.
Paetyčny fłešmob pravodzicca ŭ padtrymku respublikanskaha konkursu junych čytalnikaŭ siarod vučniaŭ 7 i 8 kłasaŭ «Čytajem pa-biełarusku z velcom». Udzielniki konkursu z usioj Biełarusi dasłali na konkurs 2048 videa z čytańniem tvoraŭ sa školnaj prahramy pa biełaruskaj litaratury. Ź lutaha pa krasavik prachodziać rehijanalnyja finały konkursu, na jakich pieramožcy pieršaha etapu vystupajuć pierad žury ŭžyvuju. Respublikanski finał konkursu adbudziecca ŭ traŭni.
Ciapier čytajuć
Ajcišnika z «Varhiejminha» sudzili pa rasstrelnym artykule. Padobna, za padtrymku Ukrainy — praŭda, zrabić jon ničoha nie paśpieŭ5
Kamientary