EurAsia Daily nazvała hałoŭnych «rusafobaŭ» u Biełarusi, jakija isnujuć na rasijskija hrošy
Niekatoryja rasijskija ŚMI praciahvajuć aburacca praz toje, što hrošy rasijskaha biznesu ŭ Biełarusi časam iduć nie na prapahandu idej «ruskaha śvietu», a na padtrymku kulturnych inicyjatyŭ i ŚMI, jakija rasijskija čarnasociency nazyvajuć «rusafobskimi».
Spačatku čarnasociency źviarnuli ŭvahu na toje, što bolšuju častku hrošaj na biełaruskamoŭnaje vydańnie knih Śviatłany Aleksijevič daŭ «Biełhazprombank», jaki na 99,82% źjaŭlajecca rasijskim. Rasijskaje vydańnie EurAsia Daily pajšło jašče dalej, i nazvała hałoŭnyja «rusafobskija prajekty» ŭ Biełarusi, jakija isnujuć na rasijskija hrošy.
U pieršuju čarhu čarnasociency źviartajuć uvahu na biełaruskija ŚMI z rasijskim kapitałam, takija jak «Biełhazieta», «KP u Biełarusi», «Arhumienty i Fakty ŭ Biełarusi», dzie
«ŭ apošnija niekalki hadoŭ usio čaściej stali publikavacca całkam adkrytyja vypady suprać Rasii i jaje palityki».
EurAsia Daily źviarnuła ŭvahu i na dziejnaść niekatorych biełaruskich vydaviectvaŭ, jakija byli stvorany z udziełam rasijskaha kapitału, ale vydajuć
«adkryta nacyjanalistyčnuju litaraturu rusafobskaha charaktaru».
Asobna čarnasociency prajšlisia pa biełaruskim pradstaŭnictvie rasijskaha ahienctva «Sputnik». Heta ŚMI krytykujuć za toje, što jano nibyta daje trybunu «rusafobam» (naprykład, Siarhieju Michałku i Arsieniju Sivickamu).
«U toj ža čas, na sajcie «Sputnika» praktyčna nie raspaviadajecca pra dziejnaść arhanizacyj rasijskich suajčyńnikaŭ, tam nie publikujecca analityka niezaležnych prarasijskich ekśpiertaŭ, i hetak dalej. Partał faktyčna adrazu staŭ nie tolki čarhovym ruparam biełaruskaj dziaržaŭnaj prapahandy, ale i jaje apanientaŭ, jakija marać pra «biełarusizacyju»»,
— aburajecca EurAsia Daily.
Vydańnie śćviardžaje, što bolšaść rasijskich ŚMI ŭ Biełarusi ŭdzielničaje ŭ prasoŭvańni idej «miascovych rusafobaŭ». Čarnasociency pałochajuć, što «rusafobija» ŭ Biełarusi budzie praciahvać nabirać abaroty. Siarod pryčyn EurAsia Daily nazyvaje:
1. absalutnuju biaździejnaść rasijskaha pasolstva ŭ Biełarusi;
2. adsutnaść u Biełarusi prarasijskaha łobi;
3. pramoje abo ŭskosnaje finansavańnie z boku Rasii pradstaŭnikoŭ antyrasijski nastrojenaj častki hramadstva.
Ciapier čytajuć
«Razmaŭlaŭ uvieś čas pa-biełarusku». Pavieł Sieviaryniec zapisaŭ svoj pieršy zvarot paśla vyzvaleńnia11
«Razmaŭlaŭ uvieś čas pa-biełarusku». Pavieł Sieviaryniec zapisaŭ svoj pieršy zvarot paśla vyzvaleńnia
«Heta ryzykoŭna dla Biełarusi». Zialenski zajaviŭ, što Rasija raźmiaščaje abstalavańnie dla naviadzieńnia šachiedaŭ na dachach biełaruskich šmatpaviarchovikaŭ2121
Kamientary