Bahata ilustravanaja, na dobraj papiery kniha naradziłasia ź inicyjatyvy supolnaści karystalnikaŭ partału «Izroj».
Meta knihi — pakazać sučaśnikam spadčynu Vialikaha Kniastva Litoŭskaha. Troje ź ciapierašnich aŭtaraŭ (Dz.Hulecki, A.Hramyka, A.Kryvaručka) letaś užo vydali knihu «Manety Biełarusi da 1707 hodu».
Pieršy raździeł knihi pryśviečany mapam i hraviuram, što źviazanyja z VKŁ. Heta pieršaja sproba systematyzavać cikavuju, ale mała viadomuju dla bolšaści halinu našaj spadčyny. Pradstaŭlenyja viadomyja i mała viadomyja staražytnyja mapy VKŁ i hraviury biełaruskich haradoŭ. Jość tablicy z aŭkcyjonnymi koštami niekatorych vydańniaŭ.
Pry kancy knihi padadzienyja parady — «Mapy ŭ interjery» — ab pravilnym raźviešvańni, dohladzie i zachoŭvańni staražytnych mapaŭ i hraviuraŭ.
Druhi raździeł knihi pryśviečany manetam, što abaračalisia na ziemlach Biełarusi ad časoŭ Jahajły da apošniaha karala Rečy Paspalitaj Stanisłava Paniatoŭskaha. Źmieščany pašyrany kataloh z prybliznymi koštami na biełaruskim rynku.
Pradstaŭlenyja daśledavańni biełaruskich numizmataŭ pa litoŭskich manetach Alaksandra Kazimiraviča i Žyhimonta Staroha, połackich falšyŭkach livonskich manet, litoŭskich baracinkach 1660—1661 hh. i vytvorčaści manet za časami Paniatoŭskaha. Čytača zacikavić taksama nievialikija zaciemki «Cikavyja fakty», padadzienyja ci nie na kožnaj staroncy ab pracy myncaŭ (manetnych dvaroŭ), karaleŭskija pryvilei i inšyja padziei, źviaznyja z vytvorčaściu manet na ziemlach VKŁ.
Treci raździeł pradstaŭlaje pryvatnyja piačatki VKŁ. Kniha prapanuje šmatlikija fota piačatak litoŭskaj šlachty, zamožnych mieścičaŭ i habrejskich handlaroŭ, što zachoŭvajucca ŭ pryvatnych kalekcyjach i publikujucca ŭ Biełarusi ŭpieršyniu.
Kniha staniecca nia tolki dobrym ajčynnym dapamožnikam dla kalekcyjaneraŭ, ale ž i zaachvocić šmat kaho da źbirańnia staražytnych rečaŭ, źviazanych ź Vialikim Kniastvam.
Rusłan Raviaka, Baranavičy