«Biełzamiežbud» pabuduje chram i kompleks BPC na vulicy Vyzvaleńnia ŭ Minsku
Kampanija «Biełzamiežbud» pabuduje kompleks Biełaruskaj pravasłaŭnaj carkvy na vulicy Vyzvaleńnia. Na dniach dziela hetaha źnieśli budynak byłoha vajenkamata. Kali źjavicca novy kompleks i jak jon budzie vyhladać — u materyjale TUT.BY.
Ab budynkach XIX stahodździa ŭ miežach vulic Vyzvaleńnia — Špalernaja, jakija ŭžo niekalki hadoŭ znachodziacca ŭ paŭavaryjnym stanie, pisali daŭno. BPC doŭha šukała inviestara, kab pabudavać tut kulturna-aśvietnicki centr. A ŭžo ŭ červieni hetaha hoda stała viadoma, što jaho ŭźviadzie kampanija «Biełzamiežbud», źviazanaja ź biznesmienam i pravasłaŭnym miecenatam Viktaram Šaŭcovym.
Pamiž kampanijaj i Minskaj jeparchijaj byŭ padpisany dahavor ab budaŭnictvie chrama ŭ honar Uvaskrasieńnia Słavuščaha i šmatfunkcyjanalnaha duchoŭna-aśvietnickaha kompleksu budynkaŭ. A na dniach na placoŭcy budučaha kompleksu źnieśli budynak byłoha vajenkamata.
A voś zbudavańni XIX stahodździa na Vyzvaleńnia 6, 6a, čakaje rekanstrukcyja — heta abjekty historyka-kulturnaj spadčyny. Kompleks płanujuć pabudavać da śniežnia 2019 hoda, i jon budzie vyhladać voś tak.
Nahadajem, budaŭnictva novaha kompleksu administracyjnych budynkaŭ dla BPC na vulicy Vyzvaleńnia pobač ź isnujučym budynkam Minskaha jeparchijalnaha ŭpraŭleńnia mitrapalit anansavaŭ u śniežni 2015 hoda. U pačatku sakavika 2016 ha Alaksandr Łukašenka asabista ŭchvaliŭ hety prajekt, «kali ŭźnikła takaja nieabchodnaść».
«Biełzamiežbud» viadomy budaŭničymi prajektami ŭ Vieniesuele, dzie biełarusy pabudavali zavody i sacyjalnaje žyllo. Staršynioj rady dyrektaraŭ hetaj kampanii źjaŭlajecca Viktar Šaŭcoŭ. Jon taksama vystupaje staršynioj naziralnaj rady banka «Rašeńnie». Šaŭcoŭ — pravasłaŭny miecenat. Jon pabudavaŭ niekalki cerkvaŭ i ŭznaharodžany najvyšejšaj uznaharodaj BPC — ordenam śviatoha Kiryły Turaŭskaha.
Akramia taho, Šaŭcoŭ zasnavaŭ u Emiratach kampaniju Future Metro, jakaja była pradadzienaja «Biełzamiežbud». Jon taksama źjaŭlajecca ŭładalnikam arabskaj kampanii BZS invest FZE. Svaim partnioram jon nazyvaje Machamieda Achmada Al Suviejdzi (Mohammed Ahmad Alsuwaidi), dyrektara i ŭładalnika kampanij PSGT Middle East General Trading i Alm Investments.
Ciapier čytajuć
Chto ciapier prapisany ŭ aficyjnaj rezidencyi Drazdy razam z Łukašenkam?13
Kamientary