Aŭtamabil žurnalistaŭ pierad trahiedyjaj ruchaŭsia ŭ kałonie z dvuch mašyn. Heta vynikaje ź infarmacyi, jakuju atrymała z CAR hrupa pa rasśledavańni abstavinaŭ hibieli Archana Džemala, Alaksandra Rastarhujeva i Kiryła Radčanki, stvoranaja Michaiłam Chadarkoŭskim, paviedamlaje «MBCH Miedyja».
Mašyna, u jakoj byli troje rasiejcaŭ i miascovy kiroŭca, išła druhoj. Pieršy aŭtamabil zabojcy, jakija znachodzilisia ŭ zasadzie, prapuścili i metaskiravana napali na mašynu z žurnalistami.
Praviły, składzienyja śpiecyjalistami AAN, kłasifikujuć darohi Centralnaafrykanskaj respubliki pa troch katehoryjach - pa stupieni ich biaśpieki.
Pa darohach «čyrvonaha», najvyšejšaha ŭzroŭniu pahrozy, ruch mahčyma tolki ŭ supravadžeńni vajennaha eskortu. Pry hetym usie, chto jedzie, pavinny być u šlemach i broniekamizelkach.
Padčas ruchu pa darohach «aranžavaha» ŭzroŭniu niama patrabavańniaŭ padarožničać z uzbrojenym eskortam. Šlemy i broniekamizelki pavinny być u najaŭnaści ŭ aŭtatransparcie, ale ich našeńnie nie abaviazkova.
Pry ruchu pa darohach «zialonaha» ŭzroŭniu patrabavańni mieć broniekamizelki i šlemy adsutničajuć.
Na darohach ŭsich troch uzroŭniaŭ - «čyrvonaha», «aranžavaha» i «zialonaha» - rekamiendavana pierasoŭvacca hrupami ź minimum dźviuch mašyn. Pry hetym u kožnaj mašynie pavinna być nie mienš za dvuch čałaviek.
Rasijskaja zdymačnaja hrupa padčas pajezdki pa darohach CAR 30 lipienia amal uvieś čas jechała darohami «zialonaha» ŭzroŭniu. Tolki na vyjeździe z horada Sibiu mašyna zajechała na darohu «aranžavaha» ŭzroŭniu pahrozy.
Na dumku krynic hrupy ŭ CAR, žurnalisty vyrašyli abjadnacca ź jašče adnym aŭtamabilem, zhodna z praviłami biaśpieki. Pakul nieviadoma, chto jechaŭ u aŭtamabili, jaki złačyncy vyrašyli prapuścić. Hetak ža nieviadoma, čamu žurnalisty vyrašyli źmianić pieršapačatkovy maršrut.
Žurnalisty Archan Džemal, režysior Alaksandr Rastarhujeŭ i apieratar Kirył Radčanka byli zabityja ŭ Centralnaafrykanskaj Respublicy na padjeździe da transpartnaha vuzła Sibiu 30 lipienia. Rasiejcy pracavali nad rasśledavańniem «Rasijskija najmity» ab pryvatnaj vajennaj kampanii Vahniera.
Kamientary