Trasca, horšaja za barščeŭnik. Pra raślinu, jakaja atručvaje lasy pa ŭsioj Biełarusi
Va ŭstanovy Słonimskaha rajonu pryjšoŭ zahad vyniščyć kusty sumnika kanadzkaha, piša Radyjo «Svaboda». Heta raślina ličycca dekaratyŭnaj. Ale, akazvajecca, jana ŭvachodzić u lik najbolš niebiaśpiečnych invazijnych raślinaŭ. Dla pryrody jon bolš niebiaśpiečny, čym barščeŭnik Sasnoŭskaha.
«Va ŭsie arhanizacyi i sielskija saviety pryjšoŭ zahad ad rajonnaj inspekcyi pryrodnych resursaŭ i achovy navakolnaha asiarodździa. Kab abśledavali svaju terytoryju, i kali tam budzie sumnik, jaho treba źniščyć. Navat z klumbaŭ jaho zahadali zrezać», — paviedamili čytačy Svabodzie.
U Instytucie eksperymentalnaj bataniki Nacyjanalnaj akademii navuk paćviardžajuć, što sumnik, abo załatacień, kanadzki (Solidago canadensis) — škodnaja raślina. Razam z barščeŭnikam Sasnoŭskaha i šalonym hurkom jon uvachodzić u lik troch najbolš niebiaśpiečnych raślin. Pra heta Svabodzie skazaŭ Aleh Masłoŭski, zahadčyk sektaru kadastru raślinnaha śvietu.
«Salidaha vyciaśniaje miascovyja raśliny i źmianiaje ekasystemy, — kaža Masłoŭski. — Jano źmianiaje raślinnaje pokryva našych zaliŭnych łuhoŭ, pojmaŭ rek, a ciapier i lasoŭ».
Invazijny dla Biełarusi vid pachodzić z Paŭnočnaj Ameryki. Doŭhi čas u Biełarusi jaho vyroščvali jak dekaratyŭnuju raślinu. Adnak apošnija piać hod jon staŭ prablemaj dla mnohich rehijonaŭ krainy.
Jak tłumačyć navukoviec, korań raśliny vydzialaje ahresiŭnyja rečyvy, jakija padaŭlajuć inšyja raśliny. Salidaha źmianiaje ekasystemy i ŭpłyvaje na sienakosnyja łuhi, ź lesu źnikajuć hryby i jahady.
Prablema asabliva tyčycca centralnych rajonaŭ Biełarusi: Mienskaha, Barysaŭskaha, Łahojskaha. U Smalavickim jana zajmaje ŭžo hihanckija płoščy i moža stać biedztvam.
I choć hety vid nie taki pahroźlivy dla zdaroŭja, jak barščeŭnik, Aleh Masłoŭski stavić jaho ŭ lik najbolš niebiaśpiečnych raślin Biełarusi.
«Možna ličyć, što ŭ asobnych aspektach jon bolš niebiaśpiečny za barščeŭnik, — ličyć navukoviec. — U adroźnieńnie ad barščeŭniku, jon dobra raspaŭsiudžvajecca ŭ lesie. Vyciaśniaje našy jahady i hryby. Pad sucelnym pokryvam sumniku ŭ lesie ŭžo amal ničoha nie raście».
Za hod salidaha pavialičvaje svaju płošču na 17%.
Lepš za ŭsio hetuju raślinu vykopvać razam z koraniem, a potym spalvać ci zakopvać. Kali raślina zaniała cełaje pole, možna jaho prosta skasić ci atrucić. Heta prynamsi spynić pašyreńnie.
Navukoviec kaža, što ŭ Biełarusi pryniataja nacyjanalnaja stratehija pa baraćbie ź invazijnymi raślinami. Adnak amal usie srodki iduć na vyniščeńnie barščeŭniku.
Pakul sa škodnaj raślinaj zmahajucca tolki ŭ niekatorych rehijonach. Aleh Masłoŭski raić pačać z taho, kab sadavody chacia b pierastali vyroščvać salidaha ŭ siabie na ŭčastkach.
Ciapier čytajuć
Ryta Dakota nabyła dom za niekalki miljonaŭ dalaraŭ kala Halivuda15
Ryta Dakota nabyła dom za niekalki miljonaŭ dalaraŭ kala Halivuda
Topavy pierakładčyk pajechaŭ u Biełaruś mianiać pašpart — i sieŭ za danaty. «KDB pahladzieŭ na sumu i vyrašyŭ, što nichto ŭ zdarovym rozumie nie moža vydatkavać stolki ŭłasnych hrošaj»1515
Kamientary