U sudzie vyśvietliłasia, što telefony Fiadyniča i Komlika prasłuchoŭvajucca dahetul
Na sudovym pasiedžańni 15 žniŭnia ŭ kryminalnaj spravie lideraŭ prafsajuzu REP prakuror začytaŭ źmiest telefonnych razmovaŭ Hienadzia Fiadyniča i Ihara Komlika z supracoŭnikami prafsajuzu i śviedkam, piša Radyjo Svaboda.
Pavodle prakurora, «z 31 lipienia pa 9 žniŭnia 2018 hodu praviedziena aperatyŭna-pošukavaje śledztva. Niekatoryja dadzienyja zapisanyja».
Adna razmova tyčyłasia dapamohi advakataŭ. Śviedka pa spravie Nadzieja Jesipovič raiłasia z Hienadziem Fiadyničam, što kazać, ci iści sa skarhaj u prakuraturu. Fiadynič daje ŭkazańnie iści tolki z advakatam. Razmaŭlajuć jany i pra psychalahičny cisk, pra pahrozy — u sudzie mnohija śviedki admovilisia ad pakazańniaŭ, dadzienych na papiarednim śledztvie, tamu što na ich cisnuli i zapałochvali, i paśla hetaha, niekalki dzion tamu, čatyroch čałaviek znoŭ dastavili ŭ Śledčy kamitet.
U razmovie Fiadyniča ź lideram Biełaruskaha niezaležnaha prafsajuzu Mikałajem Ziminym taksama havorka idzie pra toje, kab śviedka Śniažana admaŭlałasia havaryć biez advakata.
Paśla ahučvańnia ŭsich telefonnych razmoŭ Hienadź Fiadynič zapytaŭsia ŭ prakurora, jakim čynam ažyćciaŭlajecca hetaje prasłuchoŭvańnie i na padstavie čaho.
«Ja pakul na voli i źjaŭlajusia kiraŭnikom prafsajuzu. Hetaja razmova z buchhaltarkaj Hienrychaŭnaj… Vy nia mieli prava začytvać ich uvohule! Za kožnym a 7 hadzinie ranicy pryjšli pa 4 čałavieki! Vy kažacie, što niama cisku, ale tut ža piarečycie hetamu! Nielha było ich pa-inšamu vyklikać?
I my budziem tłumačyć ludziam, jak pavodzić siabie, raspaviadać pra ich pravy i abaviazki padčas zatrymańniaŭ i dopytaŭ! Jany nia viedajuć hetaha, nie adukavanyja jurydyčna, a vy hetym karystajeciesia!», — aburyŭsia staršynia prafsajuzu REP.
Na jahonuju dumku, prasłuchoŭvańnie, zroblenaje z parušeńniem zakonu, nia maje jurydyčnaj siły.
Hienadzia Fiadyniča i Ihara Komlika abvinavačvajuć va ŭchileńni ad spłaty padatkaŭ na 23 tysiačy rubloŭ. Jak ličyć śledztva, pa vinie svaich lideraŭ prafsajuz REP nie spłaciŭ u dziaržaŭny biudžet padatkaŭ na ahulnuju sumu 22 tysiačy 867 rubloŭ 10 kapiejek. Abvinavačańnie padało pazoŭ ab spahnańni majomasnaj škody na hetuju sumu.
Lideram REP vystaŭlenyja abvinavačańni va «ŭchileńni ad spłaty padatkaŭ u asabliva bujnym pamiery» (č. 2 art. 243 KK), im pahražaje abmiežavańnie voli da 5 hadoŭ abo pazbaŭleńnie voli ad 3 da 7 hadoŭ z kanfiskacyjaj majomaści.
Fiadynič i Komlik abvinavačańni abviarhajuć. Jany zajaŭlajuć, što praces suprać ich — heta reakcyja ŭładaŭ na aktyŭnyja dziejańni REP u spravie abarony pracoŭnych. Komlik pravioŭ za kratami dva miesiacy, Fiadynič ad pačatku śledčych dziejańniaŭ u žniŭni 2017 hodu zastajecca pad padpiskaj ab niavyjeździe.
Pavodle takoha ž artykułu ŭ 2011 hodzie sudzili staršyniu pravaabarončaha centru «Viasna» Alesia Bialackaha. Jaho pakarali 4,5 hadami źniavoleńnia ŭ kalonii ŭzmocnienaha režymu z kanfiskacyjaj majomaści, a vyzvalili praz 3 hady. Biełaruskija, eŭrapiejskija i amerykanskija pravaabaroncy pryznali Bialackaha palitviaźniem, prysud byŭ nazvany palityčna matyvavanym. Pra praces padrabiazna raskazaŭ Valer Kalinoŭski ŭ knizie «Sprava Bialackaha»
Kamientary