Palityk Pavieł Sieviaryniec paśla čarhovych sutak, na jakija jon trapiŭ za akcyi ŭ Kurapatach, padzialiŭsia z hramadskaściu niezvyčajnaj navinoj. Maŭlaŭ, biełaruskamoŭnaha fiermiera rodam z Azierbajdžana 5 miesiacaŭ trymajuć pad vartaj, bo jon admaŭlajecca ad supracy z orhanami.
«Naša Niva» pacikaviłasia hetaj historyjaj.
I voś što atrymałasia. Siejmur Mamiedhusiejnaŭ sapraŭdy znachodzicca ŭ IČU z krasavika. Ale pryčyny, pa jakich jon tudy trapiŭ, u kožnaha boku hetaj historyi roznyja.
Chto taki Mamiedhusiejnaŭ
Siejmuru Mamiedhusiejnavu 50 hadoŭ, jon naradziŭsia ŭ tady jašče Azierbajdžanskaj SSR u horadzie Ali-Bajramły.
U 1989 hodzie jon pierajechaŭ u Biełaruś. Asieŭ u Lidzie. Tam ažaniŭsia ź biełaruskaj, u 1991 hodzie ŭ ich naradziŭsia syn Rafael. Ale nieŭzabavie para raźviałasia.
U 1996 hodzie Mamiedhusiejnaŭ atrymaŭ biełaruskaje hramadzianstva.
Ad pačatku 2000-ch jon žyŭ u Minskim rajonie. Usio było aficyjna, Siejmur mieŭ prapisku. Pracavaŭ tavaraznaŭcam. Žyŭ razam ź biełaruskaj Alesiaj. Šlub jany nie afarmlali, ale zaviali dzicia (iznoŭ syn, nazvali Achmiedam).
Ale ŭ 2006 hodzie ŭ Mamiedhusiejnava zabrali pašpart. Patłumačyli heta tym, što Siejmur maje hramadzianstva Azierbajdžana (ale ž azierbajdžanskaha pašparta jon nie mieŭ). Mamiedhusiejnavu aformili prava na žycharstva ŭ Biełarusi. Jaho praciahvali niekalki hadoŭ, ale ŭ 2010 Siejmuru prapanavali źviarnucca ŭ pasolstva Azierbajdžana i atrymać tam pašpart. Prava na žycharstva ŭ Biełarusi anulavali. Rehistracyju ŭ Minskim rajonie taksama. U pasolstvie ž adkazali, što Siejmur hramadzianinam Azierbajdžana nie źjaŭlajecca. Pašpart jon tak i nie atrymaŭ.
Paśla biełarusy vydali ŭsio ž Siejmuru prava na žycharstva. Ciapier — jak asobie biez hramadzianstva.
Mamiedhusiejnaŭ zajmaŭsia fiermierstvam, vyroščvaŭ i pradavaŭ bulbu, taksama byŭ adnym z zasnavalnikaŭ firmy, jakaja skuplała bulbu ŭ biełaruskich fiermieraŭ dy viaskoŭcaŭ i pradavała jaje ŭ Małdovu i Sierbiju.
Za praciahły čas pracy ź viaskoŭcami Siejmur sapraŭdy trochi vyvučyŭ biełaruskuju. Ale razmaŭlaje i na joj, i na ruskaj. Usio ž, ščyra kažučy, biełaruskamoŭnym jaho nazvać nielha.
Ale ŭ 2016 hodzie prava na žycharstva jamu anulavali znoŭ. Pačałasia pierapiska z čynoŭnikami. Siejmur prasiŭ vydać jamu prava na žycharstva ŭ Biełarusi, bo tut jon maje siamju, a svajakoŭ u Azierbajdžanie ŭ jaho nie zastałosia. Mamiedhusiejnaŭ sprabavaŭ atrymać dazvoł na pastajannaje pražyvańnie ŭ Biełarusi, jamu admaŭlali. Tak ciahnułasia bolš za hod.
U krasaviku 2018 hoda ŭ Siejmura skančvałasia časovaja rehistracyja. Jon pajšoŭ u adździeł pa hramadzianstvie i mihracyi UUS Minskaha rajona. Dadomu Siejmur užo nie viarnuŭsia. Jaho ŭziali pad vartu i paviedamili, što prymusova vyšluć z krainy. Akramia taho, ujezd u Biełaruś jamu budzie zabaronieny na 10 hadoŭ.
Ciapier Mamiedhusiejnaŭ usio jašče pad vartaj. Nijakaha hramadzianstva jon nie maje. Tamu vyrašajecca pytańnie, jakaja kraina pahadzicca jaho pryniać.
Kryminalnik ci achviara?
Ale ž čamu raptam milicyja zacikaviłasia biaskryŭdnym fiermieram?
Tut va ŭsich svaja praŭda.
Milicyja śćviardžaje, što Mamiedhusiejnaŭ maje kryminalnyja suviazi. Tamu, maŭlaŭ, u jaho i zabrali prava na žycharstva ŭ 2016 hodzie. Heta było zroblena, bo HUBAZiK paviedamiŭ, što Siejmur maje znajomstvy ŭ kryminalnych kołach Rasii, Azierbajdžana i inšych krain. Akramia taho, pa viersii siłavikoŭ, Mamiedhusiejnaŭ prymaje aktyŭny ŭdzieł u miascovym kryminalnym žyćci, vyrašaje pytańni, jakija ŭźnikajuć u azierbajdžanskaj dyjaspary. Taksama jon nibyta prymaje ŭ siabie kryminalnikaŭ, jakija pryjazdžajuć u Biełaruś, dapamahaje im finansava.
Atrymać dazvoł na pražyvańnie ŭ Biełarusi Siejmuru admovili z nastupnaj farmuloŭkaj: «Pavodle infarmacyi, jakaja pastupiła z Hałoŭnaha ŭpraŭleńnia pa baraćbie z arhanizavanaj złačynnaściu i karupcyjaj MUS, znachodžańnie Siejmura Achmiedaviča Mamiedhusiejnava na terytoryi Biełarusi moža niehatyŭna adbicca na stanie kryminahiennaj abstanoŭki».
Žonka ž Siejmura, Alesia Kudraviec, ŭpeŭnienaja, što ŭsio nie tak. Maŭlaŭ, siłavikam navat nie treba, kab jon źjazdžaŭ — jany prosta cisnuć na Mamiedhusiejnava, kab atrymać patrebnuju infarmacyju.
«Siejmur daŭno žyvie ŭ Biełarusi, ale jon nijaki nie kryminalnik. Jon navat z dyjasparaj nie padtrymlivaŭ znosin, pracavaŭ nie z azierbajdžancami, a ź biełarusami. Pra niejki kryminał heta prydumała milicyja, — zapeŭnivaje Alesia Kudraviec. — Im navat nie treba, kab jon vyjechaŭ z krainy, tamu jaho i trymajuć stolki pad vartaj. Heta forma cisku na Siejmura. Siłaviki chočuć, kab jon davaŭ im patrebnuju infarmacyju na svaich znajomych.
Prychodziać z kankretnymi proźviščami i chočuć, kab jon davaŭ infarmacyju pra ich. I heta nie stolki azierbajdžancy, kolki biełarusy. Chacieli [daviedacca] štości pra jaho znajomych biełarusaŭ, jakija ŭ Rasii daŭno žyvuć. Hetyja znajomyja siadzieli ŭ turmie kaliści, tamu milicyjanty pišuć, što ŭ Siejmura nibyta suviazi z kryminalnym śvietam. Ale ž heta nie tak. I sam jon nikoli nie siadzieŭ u turmie!»
Pakul vyrašajecca los Siejmura, sam jon siadzić u IČU Minskaha rajona. Nasuprać IČU — radzilnia. Tut Alesia naradziła čarhovaha syna. Nazvała ŭ honar baćki, taksama Siejmuram.
Naradziŭsia Siejmur-małodšy ŭ žniŭni. U tym ža žniŭni čarhovuju skarhu Siejmura-starejšaha sud pastanaviŭ adchilić. Jak tolki HUBAZiK vyrašyć pytańnie z krainaj, jakaja zhodnaja pryniać Mamiedhusiejnava, taho departujuć ź Biełarusi.
Kamientary