Adździeł prymusovaha vykanańnia Škłoŭskaha rajona 19 kastryčnika nakłaŭ abmiežavańni na majomaść staršyni Partyi BNF Ryhora Kastusiova dziela zabieśpiačeńnia apłaty štrafa za Kurapaty, jaki nasamreč byŭ užo daŭno vypłačany, paviedamlaje pres-słužba Partyi BNF.
Jak paviedamiŭ Ryhor Kastusioŭ pres-słužbie Partyi BNF, 19 kastryčnika jon atrymaŭ pa pošcie ceły pakiet dakumientaŭ, źviazanych z administratyŭnymi štrafami, jakimi palityk byŭ pakarany ŭ časie sioletnich pratestaŭ u Kurapatach. U tym liku Ryhoru Kastusiovu była dasłanaja pozva i pastanova ab nakładańni abmiežavańniaŭ na majomaść u vyhladzie zabarony ažyćciaŭleńnia rehistracyjnych dziejańniaŭ u dačynieńni da aŭtamabila i haraža, jakija naležać staršyni BNF.
«Ja byŭ ździŭleny, atrymaŭšy z suda Škłoŭskaha rajonu paviedamleńnie pra ŭzbudžeńnie vykanaŭčaj vytvorčaści pa štrafach za kurapackuju vartu. Sprava ŭ tym, što ŭsie štrafy pa sioletnich administratyŭnych spahnańniach u mianie spłočanyja. Niahledziačy na heta, sudovyja vykanaŭcy vynieśli na moj adras pastanovu pra nakładańnie aryštu na aŭtamabil i haraž. Mnie daviałosia ŭ dzień tryccacihodździa BNF zajmacca kamunikacyjaj pamiž sudami ŭ Miensku, jakija vynosili pastanovy pra štrafy, i sudovymi vykanaŭcami tut u Škłovie, jakija nakłali abmiežavańni na maju majomaść dziela spahnańnia hrošaŭ u lik štrafa. Padkreślu, što hetyja štrafy byli spłočanyja mnoju jašče ŭletku.
Ja razhladaju hetyja dziejańni sudovaj ułady jak drobnuju pomstu za padadzienuju mnoju ŭ Kamitet AAN pa pravach čałavieka skarhu na vykarystańnie administratyŭnaha pieraśledu jak srodku abmiežavańnia svabody schodaŭ u Biełarusi. Hetaja skarha była ŭ minułym miesiacy mnoju padadzienaja pry dapamozie jurystaŭ pravabarončaha centru «Viasna», — skazaŭ Ryhor Kastusioŭ.
Nahadajem, što 4 lipienia sud Partyzanskaha rajonu Miensku aštrafavaŭ staršyniu Partyi BNF Ryhora Kastusiova na 30 bazavych vieličyń štrafu (735 rubloŭ) pa artykule 23.34 KaAP za ŭdzieł u akcyjach pa abaronie Kurapataŭ, dzie adčyniłasia zabaŭlalnaja ŭstanova «Pajedziem, pajadzim». Napiaredadni lider BNF byŭ brutalna zatrymany śpiecadździełam milicyi na šlachu da mienskaha aeraporta, što pazbaviła jaho mahčymaści vystupić na kanferencyi ŭ polskim Sejmie. Pa fakcie abmiežavańnia svabody schodaŭ staršynia BNF padaŭ paviedamleńnie ŭ Kamitet AAN pa pravach čałavieka.
Kamientary