Tavarystva achovy pomnikaŭ biare vialikija hrošy ad Zajdesa. Sieviaryniec i Šapućka kateharyčna suprać
Abaronca Kurapataŭ Hanna Šapućka aburanaja, što Biełaruskaje dobraachvotnaje tavarystva achovy pomnikaŭ historyi i kultury źbirajecca ŭziać hrošy va ŭłaśnika restarana «Pajedziem, pajadzim» Leanida Zajdesa. Na sustreču ź biznesmienam chadziŭ pradstaŭnik Tavarystva Juraś Mielaškievič.
«Zajdes prapanavaŭ im hrošy na miemaryjał u Kurapatach. U Jurasia Mielaškieviča jość cełaja schiema, jon užo raskazvaŭ, na što budzie tracić hrošy, što budzie rabić. Nakolki ja razumieju, jany jašče nie ŭziali. Tamu ja i pracuju na apiaredžańnie. Moža być, jašče adumajucca. Ja doŭha razmaŭlała ź Mielaškievičam, Čacholski [kiraŭnik hramadskaj dyrekcyi Narodnaha memaryjału Kurapaty — «NN»] razmaŭlaŭ. Ale jon staić na svaim, što robić dabro dla Kurapataŭ. A toje, što mienavita Zajdes źjaŭlajecca tym čałaviekam, jaki faktyčna źmianiŭ za svaje hrošy achoŭnuju zonu, jaho heta nie chvaluje», — kaža spadarynia Šapućka.
Jana aburanaja tym faktam, što Mielaškievič samastojna pajšoŭ na pieramovy. «Nichto jaho nie abiraŭ vieści pieramovy. Možna było b pra niešta kazać, kali b Zajdes pajšoŭ na sastupki, kab viarnuŭ achoŭnuju zonu, kab začyniŭ restaran. Čałaviek robić zło, jon ździekujecca z pamiaci achviaraŭ, ale adnačasova sprabuje abialicca. I jašče sprabuje hramadskaść raskałoć hetymi hrašyma. Hrošy tyja dabra nikoli nie pryniasuć, bo jany dadzienyja, kab uratavać svaju skuru», — miarkuje aktyvistka.
My źviarnulisia z prośbaj ab kamientary da Jurasia Mielaškieviča. Jon miarkuje, što havaryć pra zakryćcio ŭstanovy nie vypadaje, tamu važna damaŭlacca.
«Ja suprać raskułačvańnia, niavažna pad jakimi łozunhami jano adbyvajecca. My svaju pazicyju vykazali daŭno, nijakich surjoznych parušeńniaŭ tam niama.
I prytrymlivajemsia hetaha ŭžo šmat hadoŭ. Kali abaroncy Kurapataŭ dumajuć, što zaraz Śledčy kamitet ci KDB zaviaduć kryminalnuju spravu i zabiaruć hety restaran, to značyć jany viedajuć bolš, čym toje, što apublikavana.
Jurydyčnych padstavaŭ havaryć pra zakryćcio «Pajedziem pajadzim» nie vypadaje.
Navat kali jaho zabiaruć u Zajdesa, to źjaviacca novyja ŭłaśniki. Doŭha biez spravy hety budynak stajać nie budzie. Mnie niezrazumieła, našto hetym zajmacca, kali ŭ nas šmat spravaŭ mienavita ŭ miemaryjale?
Na apošnija Dziady pryjšło ŭsiaho 150 čałaviek. Heta značyć, treba mianiać padychody, rytoryku, mietady dziejańnia», — raskazvaje Mielaškievič.
Ci sapraŭdy Tavarystva achovy pomnikaŭ biare hrošy va ŭłaśnikaŭ restarana? «My robim usio adkryta. U mianie była sustreča ź Leanidam Zajdesam, dzie abmiarkoŭvali situacyju z restaranam. Ułaśnik skazaŭ, što raniej jon nie adčuvaŭ, što za miesca Kurapaty, ciapier schadziŭ tudy, zrazumieŭ. Tady ja prapanavaŭ, što my možam zrabić za hrošy biznesmiena dla miemaryjału. Pierš za ŭsio heta lehalizacyja i pašpartyzacyja kryžoŭ. Heta budzie kaštavać 6 tysiač rubloŭ.
Hrošy buduć pieravodzicca na rachunak nie Tavarystva achovy pomnikaŭ, a inšaj arhanizacyi. My zapłanavali praviadzieńnie naprykancy hoda kruhłych stałoŭ pa tematycy represij z udziełam pradstaŭnikom KDB.
Na 14 listapada ja razam z Antonam Astapovičam zapisaŭsia na pryjom da pieršaha namieśnika staršyni KDB Ihara Sierhijenki, havorka budzie vieścisia pra dostup da archivaŭ śpiecsłužbaŭ. My płanujem pracavać mienavita z uładami.
Raspracoŭka troch turystyčnych maršrutaŭ pa miaścinach, źviazanych z masavymi represijami. Akramia Kurapataŭ, tam buduć Jama, Traścianiec, mahčyma, Chatyń. Maršruty buduć zaćvierdžanyja aficyjna ŭ Ministerstvie sportu i turyzmu. Taksama raspracujem prahramy pra represii dla škołaŭ i ŭniviersitetaŭ. Aproč taho, havorka viadziecca pra adnaŭleńnie kryžoŭ u Kurapatach. Zajdes skazaŭ, što hatovy finansavać. Na hety momant nijakaj sponsarskaj damovy nie isnuje».
Inšy abaronca Kurapataŭ Pavieł Sieviaryniec nazvaŭ prykładnuju sumu, pra jakuju moža vieścisia havorka. Heta 20 tysiač biełaruskich rubloŭ.
«U mianie davieru da Mielaškieviča i Astapoviča niama. I ja nie razumieju, što jany tam robiać. Heta moža kiepska skončycca. Mahčyma, lehalizacyja haniebnaha restarana. Budzie raskrutka ŭ presie, što Zajdes daŭ 20 tysiač rubloŭ. Ale heta mała čym roźnicca ad chabaraŭ. Ciapier jany chočuć urazdrob ci hurtam kupić hramadskaść, hramadskuju dumku. Adšpilili na heta 20 tysiač. Nie treba ŭ ich brać hrošy, treba prosta patrabavać, kab jany syšli», — adznačyŭ Sieviaryniec.
Maładuju supracoŭnicu «Pielenha» aryštavali za «zakliki da naniasieńnia škody Biełarusi». Joj pahražaje da 12 hadoŭ3
Kamientary