Kiraŭniki kampanii «BałtStroj», jakaja naležała miljarderu Dźmitryju Michalčanku, i źviazanyja ź imi biznesoŭcy dziesiać hod vykradali biudžetnyja srodki na budoŭlu i restaŭracyju abjektaŭ dziaržachovy, raspavioŭ śledstvu były namieśnik dyrektara kampanii «Klimat prof» Barys Malcaŭ. Pratakoły jaho dopytaŭ jość u rasparadžeńni RBK.
Kradziažy mieli miesca pa mienšaj miery na 17 abjektach, śćviardžaje Malcaŭ; zamoŭcami rabot vystupali Fiederalnaja słužba achovy (FSA) i Ministerstva kultury RF.
Siarod nazvanych Malcavym abjektaŭ - Hranavitaja pałata Kramla, Vialiki Kramloŭski pałac, Kanstancinoŭski pałac (Pałac kanhresaŭ) u Strelnie, rezidencyja «Bačaroŭ Ručaj», Maskoŭskaja kansiervatoryja, teatr «Sovriemieńnik».
Kradziažy adbyvalisia šlacham zavyšeńnia cen za pracy i materyjały; dla subpadradčykaŭ umovaj pracy byŭ adkat «BałtStroju» ŭ pamiery da 50% ad sumy kantrakta, śćviardžaje Malcaŭ.
Barysu Malcavu vystaŭlena abvinavačvańnie ŭ rastracie ŭ ramkach spravy firmy «Ateks», padviedamasnaj FSA RF. Śledčy kamitet Rasii ličyć, što kiraŭnik «Ateksa» Andrej Kaminaŭ, aficery FSA Ihar Vasiljeŭ i Dźmitryj Ulicin, ułaśnik «BałtStroja» Dźmitryj Michalčanka, hiendyrektar kampanii i kiraŭniki kampanij-subpadradčykaŭ stvaryli złačynnuju hrupoŭku i ŭ 2014-2015 hadach vykrali 1,5 młrd rasijskich rubloŭ (kala 30 młn dalaraŭ) padčas budaŭnictva Doma pryjomaŭ u rezidencyi prezidenta RF «Nova-Aharova».
Bolšaść abvinavačanych pryznali vinu.
Historyja pačałasia ŭ 2007-m, kali top-mieniedžar «BałtStroja» Dźmitryj Tarčynski prapanavaŭ kiraŭniku «Klimat prof» Siarhieju Pierievałovu abstalavać inžyniernymi sistemami pres-centr Kanstancinaŭskaha pałaca - pomnika architektury XVIII stahodździa ŭ Strelnie, dzie hodam raniej prajšoŭ samit G8. Abjekt padparadkoŭvajecca Kiraŭnictvu spravami prezidenta RF.
Kiraŭniki «BałtStroja» i «Klimat prof» damovilisia pra adkat na karyść Tarčynskaha ŭ 20% ad cany damovy, śćviardžaje Malcaŭ. Raboty byli vykananyja chutka i jakasna, tamu «Klimat prof» pryciahnuli da rabot i na inšych abjektach pry ŭmovie adkatu ŭ 25-30%.
Pa takoj ža schiemie «Klimat prof» u 2008 hodzie abstalavaŭ inžyniernymi sistemami rezidencyju Pucina «Bačaroŭ Ručaj» - pry canie damovy ŭ 55-60 młn rasijskich rubloŭ kala 30% skłaŭ adkat, śćviardžaje śviedka.
«Klimat praf» zajmaŭsia ustalavańniem sistem vientylacyi, kandycyjanavańnia i aciapleńnia. Kab zakłaści ŭ kaštarys adkat, kampanija pa ŭzhadnieńni z «BałtStrojem» u razy zavyšała ceny na zakupku abstalavańnia. Nakrutka składała ad 200-300 da 1000%.
Pa asobnych abjektach adkat składaŭ da pałovy sumy kantraktu. Naprykład, za pracy ŭ budynku na Krasnaj płoščy «Klimat prof» zapłaciŭ 342,9 młn rasijskich rubloŭ adkatu pry sumie kantrakta 757 młn ras. rub. (U realnaści abstalavańnie kaštavała 414,5 młn ras. rub.). U damovie na budoŭlu na «Varabjovych horach» była pakazanaja suma 950 młn ras. rub., ź jakoj 360 młn prychodziłasia na adkat.
«BałtStroj» uvachodzić u chołdynhavuju kampaniju «Forum» miljardera Dźmitryja Michalčanki; apošni da svajho aryštu ŭ 2016 hodzie ličyŭsia adnym z samych upłyvovych biźniesmienaŭ Sankt-Pieciarburha, ciesna źviazanym ź siłavymi strukturami. Kampanija šmat razoŭ atrymlivała bujnyja dziaržpadrady pa linii Minkultury i FSA.
Kamientary