Były pasoł Rasii ŭ Biełarusi: Rasijanie stamilisia ad ekanamičnych prablem, treba adnavić adnosiny ź Jeŭropaj

78-hadovy Alaksandr Surykaŭ, jaki 12 hadoŭ (2006—2018) byŭ pasłom Rasii ŭ Biełarusi, viarnuŭsia žyć na svaju małuju radzimu, u Ałtaj. U intervju miascovamu partału Altapress jon padzialiŭsia svaimi pohladami na situacyju ŭ Rasii i Biełarusi. Na jahonuju dumku, rasijski narod stamiŭsia ad ekanamičnych prablem. Vychad Surykaŭ bačyć u źmienie kursu — naładžvańni adnosin ź Jeŭropaj. Toje ž jon ličyć hałoŭnaj zadačaj i dla Biełarusi.

Ab prapanovie zastacca ŭ Biełarusi

— Doma ŭ Biełarusi ŭ mianie niama. Choć prapanova zastacca była — prosta žyć. Pracavać ja ŭžo bolš nie źbiraŭsia. Ale ja nie zastaŭsia tam. Ja vyras u Ałtajskim krai, tut karani maich dziaciej. Dla mianie heta dom.

«Uźnikaje napružańnie»: pra ahresiju ŭ rasijskim hramadstvie

— U ludziej nazapasiłasia stomlenaść. Niekalki hadoŭ my žyli raźvivajučysia, ros dabrabyt hramadstva. Z 2014 hoda i sacyjalna-ekanamičnyja pakazčyki, i dachody nasielnictva stali iści stabilna ŭniz. I heta stała adkładać adbitak na śvietaadčuvańnie čałavieka. Jon u kramu prychodzić, a tam raz — raźličvaŭ niešta kupić, a nie vychodzić. I nie tolki jon sam, ale i ŭsia jaho siamja. Dobra, hod možna paciarpieć, dva, navat try. Ale ŭžo čatyry. I kažuć, što budzie jašče horš.

Da taho ž, zapuścili niaŭdała piensijnuju reformu. Jana nie adpaviadaje łohicy, ščyra kažučy. Z adnaho boku, havorycca ab vysokich technałohijach, rabatyzacyi, ličbavaj ekanomicy. A heta — skaračeńnie pracoŭnych miescaŭ. Heta značyć, treba dumać, kudy vyzvalenych ludziej uładkavać, pracujučaje nasielnictva. Bo novych pradpryjemstvaŭ stvarajecca nie tak šmat. A tut kažuć tym, chto ŭžo pavinien iści na piensiju: «Vy jašče 5 hadoŭ papracujcie, my i vas uładkujem». Kudy?

Takoha kštałtu reformy mohuć pravodzicca na stadyi intensiŭnaha raźvićcia ekanomiki. Tady čałaviek, jakomu adkładajuć piensiju, razumieje, što potym u jaho hetaja piensijnaja vypłata budzie vysokaj. Jon sam i hramadstva ŭ cełym dobra zarablajuć, čałaviek moža navat niešta adkładać. A kali jon čakaje 13 tysiač i plus tysiaču, u jaho, viadoma, sucelny niehatyŭ.

Uźnikaje napružańnie. A jano zaŭsiody vypluchvajecca ŭ niehatyŭnaje staŭleńnie da navakolnaha žyćcia. A jaho zaŭsiody źviazvajuć z uładaj, choć ty zabisia.

«Vy, što, nas bačycie ŭ pahanskim Kitai? Nie»: ab supolnych metach Rasii i Biełarusi

— Rasieja mieła damovu ab stratehičnym partniorstvie ź Jeŭropaj da 2008 hoda. Ale potym zdarylisia padziei ŭ Hruzii. Pačali znoŭ nad joj pracavać, ale pieraškodzili padziei va Ukrainie. Ale Rasieja vystupaje za toje, kab adnavić hety stratehičny dakumient. Bo my bližej da jeŭrapiejskaj supolnaści z punktu hledžańnia pachodžańnia i ładu žyćcia. I Biełaruś hetak ža. Naša hałoŭnaja zadača — adnavić adnosiny ź Jeŭrasajuzam, jak i ŭ Biełarusi. Pytańnie ŭ časie. Vy, što, nas bačycie ŭ pahanskim Kitai, ci što? Nie.

«Niama raŭnaznačnaj fihury»: pra budučyniu Łukašenki

— Ja ŭpeŭnieny, što ŭ 2020 hodzie Alaksandr Ryhoravič pojdzie na vybary i praktyčna ŭpeŭnieny, što jon na ich pieramoža. Niama ciapier raŭnaznačnaj fihury. Viadoma, pytańniem źmieny prezidenta pryjdziecca zajmacca, ale za dalahladam 2020 hoda. Łukašenka, uvohule ž, navat maładziejšy, čym Uładzimir Uładzimiravič u nas. Jość jašče porach.

• 0
• 0
• 0
• 0
• 0
• 0
• 0
• 0