U Biełarusi zapuścili pieršuju kryptabiržu. Inviestary — Prakapienia i Said Huceryjeŭ

Kampanija Currency.com stała pieršaj kryptabiržaj, zarehistravanaj u Parku vysokich technałohij z momantu pryniaćcia dekreta № 8. Inviestarami prajekta vystupili VP Capital Viktara Prakapienia i Larnabel Ventures Saida Huceryjeva. Suma inviestycyj u startap nie raskryvajecca, piša Tut.by.

Biełaruskaja kryptabirža dazvalaje abmieńvać zvyčajnyja hrošy na kryptavaluty. Heta značyć, zaraz usie biełaruskija trymalniki kryptavalut mohuć aficyjna pradavać i kuplać ich na terytoryi krainy.

Jašče adnoj asablivaściu prajekta źjaŭlajecca toje, što jon vypuskaje zvyš 10 000 takienizavanych biržavych aktyvaŭ (sa startu prajekta budzie dastupna bolš za 150 vidaŭ tokienaŭ), što robić biełaruski prajekt pieršym u śviecie ŭ svaim rodzie, zajaŭlajuć ŭładalniki.

Prapanova takienizavanych biržavych aktyvaŭ raźličana na kryptainviestaraŭ. Pa słovach kiraŭnika prajekta Currency.com Viktara Prakapieni, u pieryjad niavyznačanaści ŭ dačynieńni da mnohich kryptavalut kryptainviestary šukajuć sposaby dyviersifikacyi svaich kryptapartfielaŭ. Inviestycyi ŭ tradycyjnyja finansavyja aktyvy mohuć źjaŭlacca adnym z takich sposabaŭ. Adnak dla taho, kab inviestavać u tradycyjnyja finansavyja instrumienty, inviestary vymušanyja kanviertavać svaju kryptu ŭ fiat. Prapanova takienizavannych biržavych aktyvaŭ Currency.com vyrašaje hetuju prablemu. Takienizavany biržavy aktyŭ — heta tokien, jaki maje ekanamičnuju kaštoŭnaść adpaviednaha biržavoha aktyvu: akcyi, indeksu, kaštoŭnaha mietału abo syraviny.

«Naprykład, kali inviestar nabyŭ tokien Apple.CX, jon pačynaje nieści straty abo atrymlivać prybytak anałahičnym čynam, jak kali b jon kupiŭ akcyju Apple. Jamu buduć rabicca vypłaty, anałahična sumach dyvidendaŭ, jakija atrymlivajucca uładalnikami akcyj Apple. Važnaja asablivaść, što apieracyi z tokienaŭ vyzvalenyja ad padatkaabkładańnia da 2023. Kožny tokien, vypuščany Currency.com ŭ abaračeńnie, zabiaśpiečany. Kali klijent kuplaje tokien, jaki pradstaŭlaje, naprykład, akcyi Apple abo Tesla, to Currency.com nabyvaje akcyi hetych kampanij praź infrastrukturnaha partniora, kampaniju Capital.com, rehulavanuju viadučymi finansavymi rehulatarami FCA i CySEC », — havorycca ŭ paviedamleńni.

Dla inviestavańnia možna vykarystoŭvać dalary ZŠA, jeŭra, biełaruskija rubli i rasijskija rubli, bitkojn abo eteryum.

U adpaviednaści z patrabavańniami Parku vysokich technałohij, kryptabirža pavinna prachodzić pieryjadyčny aŭdyt adnoj z kampanij vialikaj čaćviorki. Aŭdytarskim partnioram Currency.com Bel źjaŭlajecca Deloitte.

• 0
• 0
• 0
• 0
• 0
• 0
• 0
• 0