Łukašenka zahadaŭ pierapisać navučalnyja prahramy: Kali ministr nie zrazumieŭ, to jon nie ministr

Pra heta Alaksandr Łukašenka zajaviŭ siońnia, dajučy zhodu na pryznačeńnie Michaiła Łuściankova rektaram Biełaruska-rasijskaha ŭniviersiteta, piša BiełTA.

«Prahramy VNU i škoł treba reanimavać i pryvieści ŭ narmalny vyhlad. U nas časam užo ŭ vośmym-dziaviatym kłasie vyvučajuć toje, što my raniej vyvučali ŭ VNU. Niaŭžo tak žyćcio paskoryłasia? Niaŭžo ŭsich ich matematykami rychtujem? Tamu treba vielmi surjozna zaniacca adukacyjaj. Kali ministr hetaha nie zrazumieŭ, značyć, jon nie ministr», — papiaredziŭ Alaksandr Łukašenka.

Kiraŭnik dziaržavy spytaŭ, jak naładžany navučalnyja pracesy ŭ Biełaruska-rasijskim univiersitecie, kolki tam navučajecca studentaŭ i ŭ čym asablivaści adukacyjnych prahram. Pa słovach Michaiła Łuściankova, siońnia va ŭniviersitecie ličacca zvyš 4,8 tys. biełaruskich studentaŭ i kala 430 rasijskich. «U asnoŭnym bakałaŭryjat. Mahistratura adkryta niadaŭna — šeść na dzionnym, šeść na zavočnym», — udakładniŭ jon.

Łukašenka pacikaviŭsia, jak adroźnivajecca padrychtoŭka bakałaŭraŭ i mahistrantaŭ u Biełarusi i Rasii. Michaił Łuściankoŭ rastłumačyŭ, što ŭ Rasii bakałaŭryjat razhladajecca jak pieršaja stupień vyšejšaj adukacyi, a mahistratura stała druhoj. Taki padychod, na jaho pohlad, nieracyjanalny, bo zatračvajecca bolš času na padrychtoŭku śpiecyjalista.

«Pieršaja stupień — čatyry hady. Tam, pa sutnaści, śpiecyjalist (bakałaŭr) padrychtavany na ŭzroŭni technikuma, — dadaŭ jon. — U nas sistema bolš aptymalnaja. U našaj VNU, naprykład, mahistratura razhladajecca jak padrychtoŭka kadraŭ vyšejšaj kvalifikacyi».

Alaksandr Łukašenka ŭchvaliŭ hety padychod i padkreśliŭ, što mienavita pa takim pryncypie i pavinny rychtavać mahistrantaŭ u biełaruskich VNU.

«Hladzicie, kab ni ŭ jakim razie my nie zapazyčali voś hety vopyt, jaki pieraniała Rasija, i ciapier nie viedaje, što ź im rabić, — skazaŭ jon. — U mahistraturu pavinny iści pieravažna ludzi, jakija buduć zajmacca navukaj i vykładańniem.

Usich tudy kahałam pasyłać nie treba. Dobra, my prysvoim zvańnie bakałaŭra paśla zakančeńnia VNU, kab dypłomy padychodzili, ale budziem ličyć, što heta čałaviek z vyšejšaj adukacyjaj».

Pa słovach kiraŭnika dziaržavy, niaredkija vypadki, kali maładyja ludzi pastupajuć u mahistraturu biez asablivych na toje pryčyn, pa vyniku darma hublajučy čas.

«I nie daj boh my pravierym, i heta paćvierdzicca, — papiaredziŭ jon. — Tam (u mahistratury) pavinna być admysłovaja prahrama. I heta taksama treba pravieryć: jakija prahramy ŭ mahistratury. U niekatorych VNU (ja ŭžo atrymaŭ infarmacyju i zajmajusia hetym) niejkaja šlifoŭka staroj prahramy, jakuju jany prajšli ŭ VNU.

Heta značyć ceły hod idzie paŭtor taho, što jany ŭžo vyvučyli. U lepšym vypadku pahłybleny paŭtor. Hetaha być nie pavinna. Pavinna być admysłovaja prahrama ŭ kožnaj VNU, nacelenaja na padrychtoŭku śpiecyjalistaŭ vysokaj kvalifikacyi, jakija buduć zajmacca navukaj i vykładańniem».

• 0
• 0
• 0
• 0
• 0
• 0
• 0
• 0