Śledčy kamitet: Šaścikłaśnica z Amścisłava ździejśniła samahubstva
U paniadziełak 14 studzienia ŭ horadzie Amścisłavie Mahiloŭskaj vobłaści vučanica šostaha kłasa siaredniaj škoły №2 Lizavieta M. skončyła žyćcio samahubstvam, pryniaŭšy doma niejkija leki. Amścisłaŭski rajonny adździeł Śledčaha kamiteta ŭzbudziŭ kryminalnuju spravu pa artykule 145 (daviadzieńnie da samahubstva). 16 studzienia dziaŭčynku pachavali, paviedamlaje «Jeŭraradyjo».
Čytajcie taksama: U Amścisłavie pamierła šaścikłaśnica
«Trahiedyja adbyłasia ŭ pieryjad z 16:00 pa 17:00», — paviedamili Jeŭraradyjo ŭ mahiloŭskim abłasnym upraŭleńni SK. Heta byŭ vučebny dzień.
U škole kažuć, što Lizavieta M. pražyvała z mamaj. U dziaŭčynki było šmat siabroŭ, jana zdavałasia tavaryskaj. ŚMI paviedamlali, što mahčymyja pryčyny samahubstva treba šukać mienavita ŭ navučalnaj ustanovie.
«Heta niapraŭda, — aburajecca dyrektar Amścisłaŭskaj siaredniaj škoły №2 Ała Faminova. — Jana nie pasvaryłasia ni z adnym nastaŭnikam, adnosiny ź piedahohami składvalisia dobryja. Toje, što da škoły pretenzij nie było, paćviardžajuć siabry, ź jakimi jana mieła znosiny. Pakul śledstva viadziecca, ja nie mahu kamientavać situacyju. Viedaju, što siońnia niama nijakich namiokaŭ abo materyjałaŭ, jakija pakazvajuć na vinu škoły. Vina pakul nikomu nie zaličvajecca».
U internecie taksama chadzili čutki, što padletak pakutavała na sardečnaje zachvorvańnie, maŭlaŭ, pryniała nie tyja leki, i serca nie vytrymała. U Amścisłaŭskaj centralnaj rajonnaj balnicy heta nie paćviardžajuć.
«Nijakich prablem z sercam u dziaŭčynki nie było, sudmiedekśpierty pravodzili ŭskryćcio, — tłumačyć Jeŭraradyjo namieśnik hałoŭnaha lekara Volha Cyhankova. — Nie było i inšych prablem sa zdaroŭjem, pa mienšaj miery na ŭliku jana nie stajała. Zaraz śledčyja kažuć nam, što pryčyna śmierci ŭdakładniajecca. Niešta pakaža ŭskryćcio, ale padrabiaznaści stanuć jasnyja nie raniej, čym praz paŭtara-dva miesiacy».
Rasśledavańnie praciahvajecca.
Inžyniera-kanstruktara z upraŭleńnia «Pielenha», jakoje robić techniku dla rasijskaha vojska, asudzili pa palityčnych artykułach3
Kamientary