Za atručvańniem bałharskaha biznesoŭca staić toj ža ahient HRU, jaki fihuravaŭ u spravie Skrypaloŭ — rasśledavańnie

Śledčyja ŭstanavili, što treci padazravany ŭ atručvańni Skrypaloŭ — aficer rasijskaha Hałoŭnaha raźviedvalnaha ŭpraŭleńnia (HRU), jaki chavajecca pad imiem «Siarhiej Fiadotaŭ» — byŭ u Bałharyi ŭ krasaviku 2015 hoda za niekalki dzion da atručvańnia miascovaha pradprymalnika Jemiliana Hiebrava i jaho syna.

«Fiadotaŭ», hetak ža jak i jaho kalehi Anatol Čapiha i Alaksandr Miškin, atrymaŭ svaju novuju identyfikacyju ŭ 2010 hodzie. Jon aktyŭna padarožničaŭ pa Jeŭropie, Azii i Blizkim Uschodzie, jak praviła, źjaŭlajučysia ŭ «haračych kropkach» za niekalki dzion da padziej, jakija potym traplali ŭ naviny.

Pajezdka «Fiadotava» u Bałharyju ŭ 2015-m hodzie maje vielmi šmat ahulnaha z padziejami ŭ Sołśbiery, kali atrucili Skrypaloŭ. 24 krasavika 2015 hoda rasijski raźviedčyk prybyŭ rejsam z Maskvy na bałharski kurort Burhas. U jaho byŭ bilet na zvarotny rejs na 30 krasavika z Safii ŭ Maskvu. Adnak jon nie źjaviŭsia na hety rejs. Zamiest hetaha, pozna ŭviečary 28 krasavika, jon źjaviŭsia ŭ aeraporcie Ataciurka ŭ Stambule i ŭ apošniuju chvilinu nabyŭ bilet na rejs u Maskvu.

Raniej u hety dzień bałharski pradprymalnik Jemilian Hiebraŭ byŭ špitalizavany paśla taho, jak straciŭ prytomnaść na pryjomie ŭ Safii. Prykładna ŭ hety ž čas jaho darosły syn i adzin z kiraŭnikoŭ jaho kampanii raptoŭna zachvareli. Usie troje byli špitalizavany ź simptomami ciažkaha atručvańnia. Stan Jemilijana Hiebrava chutka pahoršyŭsia, i jon trapiŭ u komu. Daktary vykazali zdahadku, što atruta była vykarystana ŭ dzień abo dni, jakija papiaredničali 28 krasavika. Adnak daktary nie zmahli vyznačyć jaje.

Bałharskaja balnica źviarnułasia pa dapamohu da dvuch viadučych łabaratoryj, jakija śpiecyjalizujucca na kantroli chimičnaj zbroi. Adna ź ich, łabaratoryja Univiersiteta Chielsinki, praviała pilny analiz i zmahła ŭstalavać ślady dvuch arhanafasfataŭ, jakija śviedčyli pra toje, što pradprymalnika sprabavali zabić niervova-paralityčnym rečyvam, jakija adnosiacca da siamiejstva «Navička», pieradaje The Insider.

Praź miesiac paśla špitalizacyi stan Jemiliana Hiebrava istotna palepšyŭsia, i jaho vypisali. Jon raspavioŭ Bellingcat, što praź niekalki dzion, u kancy maja, jon znoŭ adčuŭ siabie drenna i byŭ paŭtorna špitalizavany.

U hety ž čas, 24 maja 2015 hoda, «Siarhiej Fiadotaŭ» viarnuŭsia ŭ Bałharyju pramym rejsam z Maskvy. Jon zabraniravaŭ zvarotny rejs na 28 maja 2015 hoda, adnak znoŭ nie źjaviŭsia na jaho. Praz dva dni, 30 maja, jon vylecieŭ z susiedniaj Sierbii ŭ Maskvu.

Pajezdka «Fiadotava» ŭ Vialikabrytaniju padčas atručvańnia Skrypaloŭ adbyvałasia pa toj ža madeli. Jon prybyŭ u Złučanaje Karaleŭstva ŭ toj ža dzień, što Čapiha i Miškin, ale na inšym samalocie. Jon pavinien byŭ vylecieć 4 sakavika 2018 hoda, kali Skrypali byli atručany, ale, jak i ŭ vypadku z Bałharyjaj, «Fiadotaŭ» nie źjaviŭsia na rejs. Zamiest hetaha jon viarnuŭsia ŭ Maskvu ź inšaj jeŭrapiejskaj stalicy praź niekalki dzion.

Jemilian Hiebraŭ źviazvaje cikavaść rasijskich śpiecsłužbaŭ da svajoj asoby ź dźviuma mahčymymi pryčynami. Pieršaja — jon byŭ eksparcioram śpiecyjalizavanaj vajennaj techniki va Ukrainu. Pradprymalnik kaža, što jon ažyćciaŭlaŭ pastaŭki «ŭ strohaj adpaviednaści z bałharskimi i jeŭrapiejskimi normami». Druhaja pryčyna — mahčymaja zacikaŭlenaść Rasii ŭ kantralavanym im zavodzie-vytvorcy zbroi, jakaja ličacca stratehična važnaj dla Bałharyi i NATA.

• 0
• 0
• 0
• 0
• 0
• 0
• 0
• 0